Дагъусттаннал министр Къиргъисттаннай

Къиргъисттаннай Аьрасатнал шинал лагрулий хьусса Магьирлугърал кьинирдай гьуртту хьунни Дагъусттаннал культуралул министр Зарема Буттаева. Аьрасатнал ва Къиргъизнал хIукуматирттал дянивсса машлул ва экономикалул, элмулул техникалул ва гуманитар уртакьшиврун хас дурсса батIаврий Зарема Буттаевал бунни доклад.

Мунил кIицI лавгунни Дагъусттаннал ва Къиргъизнал дянив ччянира цIакь хьуну душиву кIива миллатрал хъунисса арсваврал – Расул ХIамзатовлул ва Чингиз Айтматовлул дусшиврийсса дахIаву
– Ва жула аьмсса аьпари, тарихри, магьирлугъри. Мунияту агьамссар хIакьину буруччин ва цIакь бан лавгмур, хIакьмур ва бучIантIимур кувнницIун кув бахIлахIисса ламурду.
Жун ччай бур чIявусса кIул бан Къиргъисттанная ва мунил ляличIисса магьирлугърая. ХIа­дурну буру Дагъусттанналмур магьирлугъращал зугу кIул бан. Къиргъизнаву 35 азарунниха ливчусса дагъусттанлувталгу ялапар хъанай бухьувкун»,– увкунни Зарема Буттаевал.
Министрнал ялагу кIицI лавгунни республика сиптачину хьушиву Дунияллул халкьуннал дянивсса миллатирттал театр­дал ва Дунияллул халкьуннал дянивсса оьрус театрдал фестиваллу даврил.
Бувсунни Дагъусттаннай зий бушиву тюрк мазрайсса магьирлугъ ккаккан дуллалисса цаппарасса идарартту: фольклорданул ва этнографиялул ансамбль «Айланай», А. Салаватовлул цIанийсса Къумукьнал Музыкалул ва драмалул театр, Нугъайнал драмалул театр, Нугъайнал миллатрал инструментирттал оркестр, Нугъайнал райондалул къавтIаврил ва хорданул коллективрду.
– Ххуйну хьунссия, литературалул ишккаккултрал дянив­сса хIала-гьурттушиврул аьдатру цIудуккан дурну, Дагъусттаннал Чичултрал ва Къиргъизнал Чичултрал союзирттал творчествалул дахIавуртту. «Дагъусттаннай гьарца шинал шайссар Дунияллул халкьуннал дянивсса литературалул фестиваль «ХIамзатовлул КIяла кьурукьирттал кьинирду». Ххарину кьамул бавияв му фестивальданий Къиргъизнавасса вакилтал, 2023 шинал Аьрасатнаву гьарза-гьартану кIицI лаглан най бухьувкун Расул ХIамзатовлун 100 шин там шаврил юбилейгу», – увкунни ахирданий Зарема Буттаевал.