Августрал 23-нний Аьрасатнал Президент Владимир Путиннул дайдирхьунни «Армия-2021» ва «Армейские международные игры-2021» тIисса дунияллул халкьуннал дянивсса аьралуннал ва техникалул форумрал даву. «Патриот» тIисса аьралуннал ва патриотътурал паркраву хъанахъисса официал церемониялий гьуртту хьунни Дагъусттаннал БакIчи Сергей Меликов ва делегация.
Форумрай гьуртту хъанай бур Дагъусттаннал цаппара хъус дуккан дайсса идарартту. Миннул сурсатру ккаккиялун дирхьуну дур Форумрал экспозициялий.
Жула республикалул каялувчи гара кьини увкIунни выставкарттал павильоннайн, миннувух «КЭМЗ» концерналул экспозициялийнгу. Ва заводрал хъамаллувран ккаккан дуллай дур электрогидравликалул системартту. Ми ишла дувайссар ПВО-рал ярагъунниву, бахьттагьалтрал аьралуннал, хьхьирил жамирдай.
Выставкалияр ххишала, Дагъусттаннал чулухатусса гьурттучитурал махъру лахъантIий бур цаппара дискуссиярттал секциярттаву.
Форум най бур августрал 22-нния 28-ннийнин «Кубинка» аэродромрай, «Альбина»тIисса полигондалий, циняв аьралуннал округирттай, Ухссавнил флотрай.
