Оьрмулул ряхцIалла шинаву, апатIсса азардануща ххассал къавхьуну жуятува личIи хьунни Лакрал райондалул Собраниялул депутат, «АРЭМ» ООО-лул генеральный директор, Инишиял СПК-лул председатель, гьарца чулуха итххявхсса, дакI-аьмал авадансса инсан, Амирдул арс Амиров Апанни.
Армиялия зана хьуну мукьах ванал захIматрал ххуллу байбивхьуссар буттал шяравусса фермалул каялувчину зузаврия, мунищала архIал ва увчIун ивкIссар Хьурттал совхозрал комсомол организациялул секретарьнугу, цувагу штатрайсса гьанулий.
Хьурттал совхоз кIидарчIуну, Хъунайнналмур совхоз сакин дур­сса чIумал, Апанни ивтун ивкIссар му совхозрал директорну. Муния махъ ванал тIивтIуну бивкIссар «Прогресс» тIисса ятту-гъаттарал кооператив. Миннилва гьанулий яла сакин бувссар СПК «Инишинский». Цувагу увчIун ивкIссар мунил председательну. ЧIирисса чIумул мутталий му аралуву диял­сса хьхьичIуннайшивуртту хьун дурну диркIссар Апаннинал.
МуницIунва 2008 шинал ванал сакин бувссар ООО «АРЭМ», строительствалуха зузисса идара. Му организациялул гьурттучишиврийну, дух къатрава бизан баврил программалул гьанулий, Лакрал райондалий бувну бивкIссар чIяву зивурду ду къатри, бувссар мукунма 600 оьрчI дуклан бюхъайсса школа, дурссар райондалул Культуралул къатрансса капитальный­сса ремонтгу.
Амирдул арс Апаннинал цIа мудангу хIурматрай ва кьиматрай ду­ссия райондалул агьалинал дянив. Цаппара шиннардий ва увчIуну ивкIссар райондалул Собраниялул депутатнугу.
Лакрал райондалул агьалинал цIаниятугу, Райсобраниялул депутатътурал цIаниятугу, райондалул администрациялул цIаниятугу дакIнийхтунусса жижара буллай буру Апаннинал щалагу кулпатрахь, уссурссуннахь, даврил уртакьтурахь. Цал бунагьирттал аьпа баннав, имандалий лавгун ля­къиннав.

Лакрал муниципал райондалул бакIчи Юсуп МахIаммадов