Ва нюжмардий МахIачкъалаллал аэропортрай цIусса терминал тIитIаврил хIакъираву ДР-лул туризмалул министрнал мурадру чIумуйну бартбигьлагьисса Эмин Мердановлул кIицI лавгунни, Дагъусттаннал аэропортрал тарихраву бакъасса ва иш агьамссаннун ккаллишиву республикалул тарихравугу.
– Вай махъсса шиннардий туристътурал Дагъусттаннайнсса аьрххи ца яла бусравссаннун ва тIалавссаннун ккаллину бур. Гьар шинах жучIанма букIлакIисса хъамаллурал ва туристътурал аьдадгу дянивну 20 % лахъ хьуну дур. Ванийн бувну, чIалай бур республикалул потенциалгу ва аралул даражагу лахъ бан багьлагьишиву. Къулагъасралун ласун багьлай бур туризмалул инфрастуктура хьхьичIуннай дан багьлагьишиву. Миннувух хьхьичIва-хьхьичI агьали транспортрал, ва гьан-бучIан лагайсса кIанттурду бакьин бувну, ххуйсса куклушиннарду дан багьлагьишивугу. Мунияту ва цIусса терминал тIитIаву ккалли бан бучIиссар Дагъусттаннал имидж гьаз дувансса хъунмасса иширан, – увкунни ванал.
