Хъамакъабитайсса 1999 шинал тарих

Хъамакъабитайсса 1999 шинал тарих

Ларгсса нюжмардий МахIачкъалалив Дусшиврул къатлуву хьунни 22 шинал хьхьичI 1999 шинал Дагъусттаннайн къачагътурал бандформированиярттал кьюкьри дурхсса тарихрал иширан хасъсса батIаву. Ванил сакиншинна дурну дия ДР-лул Миллатирттал политикалул ва диндалул иширттал министерствалул. БатIаврий гьуртту хьунни республикалул жяматийсса ишккаккултрал, динчитурал ва цаппара ведомстварттал вакилтал.

БатIаву тIитIлай, ДР-лул миллатирттал политикалул ва диндалул иширттал министр Энрик Муслимовлул кIицI бунни, дурусну 22 шинал хьхьичI, чIаххуврайсса Чачаннал республикалия Дагъусттаннал дазуйх ша лавсшиву 2000-ннияр ххишаласса террористътурал, Басаевлул ва Хаттаблул каялувсса бандформированиярттал. Гайннал мурадгу бивкIшиву, Аьрасатная Дагъусттангу ят буцан бувну, Ухссавнил Ккавкказуллай душмантурал идеологиягу дусса «халифат» дансса. Къачагътурал умудгу бивкIшиву Дагъусттаннай цивппа ххарину кьамул баншиврийнсса, шикку тIурча, миннайх лухIи душмантурайх кунна, цинявннал цачIун хьуну, рищаву дуршиву.
БатIаврий махъру лавхъминнавух ия 1999 шинал МахIачкъалаллал администрациялий зий ивкIсса, хъуншагьрулул ополченцынал кьюкьлул командирну ивкIсса, генерал-майор Шамил Аслановгу. Ванал каялувшиврийсса «Интербригадалуву» та чIумал ивкIун ур 350 ополченец. Ванал бусаврийну, дагъусттанлувтал бакъасса, та чIумал ополчентурал кьюкьравух Дагъусттаннал аьрщи дуруччин бувкIун бивкIссар Аьрасатнал цайми регионнай ялапар хъанахъисса жула ватанлувталгу.
1999 шинал Бущихъиял райондалул бакIчину ивкIсса МахIаммад УмархIажиевлул кIицI бувна къачагътал ххявхсса Бущихъиял, ЦIумадиял ва ЦIуссалакрал районнал жяматирттан тай тарихрал иширттал чIумал цал архIал ккаркшиву дяъвилул сиччагу, душманнал лавмартшиву ва щала Дагъус­ттаннал цачIуншиврул гужгу.
БатIаврил ахирданий Энрик Муслимовлул кIицI бувна, 1999 шинал тарихрая ялун нанисса никрахьгу буслай, тай иширттал чялишсса гьурттучитал эбратран буцлай, жагьилтал тарбия буллан аьркиншиву.

Читайте также: