Ккуллал райондалийсса Хъус­­ращиял школа къуртал бувсса цикссагу выпускниктал, лавайсса даражалул пишакартал хьуну, личIи-личIисса жаваблувсса къуллугъирттай зий бур. Хъусращиял школалий зий бивкIсса цIанихсса учительтурал хIадур бувсса оьрчIру Аьрасатнал яла цIанихми вузирдаву дуклай бивкIссар.

Ми, кувннал кувннащалсса дахIавугу хIура хьун къариртун, ччя-ччяни хьунабакьаву дакъассагу, шяраваллил ва школалул иширттавух ка-кумаг буллалисса гьурттушинна дуллайнма бур.
Вай гьантрай хьунабавкьунни 1971 шинал школа къуртал бувсса оьрчIру, ххюцIалла шинал юбилейрай.

Буниялагу, 50 шин – му чIивисса мутта бакъар, танисса жагьилтурал оьрчIал оьрчIру хьуну бур. Ва выпускрал оьрч1ру буттал к1анттух ччаву дусса, цивппа лявхъусса мина ядан х1арачат буллалисса бур. Ва ххуллухгу вай выпускниктурал цала чулухасса кумагран Хъусращиял школалун дуллунни 50 азарда къуруш.

Хьунабакьаврил тIааьнсса лахIзардайну чIалай бия оьрчIал ва душваврал школалий дуклайнира цIакьсса дусшиву диркIшиву, кувннан кув уссурвал ва ссурвал кунма ххирасса бушиву. Выпускниктал дакIнийн дичлай бия школалул оьрмулул чIунну, дакIнийн бичлай бия цахьра дарсру дирхьусса, цивппа чивун буккан був­сса учительтал.
Хьунабакьаврил мажлисрайн оьвкуну бия АьФ-лул лайкь хьу­сса учитель ХIасан АхIмадовлуйн, Дагъусттаннал социал дузалшиннарду дуллалисса профсоюзрал комитетрал председатель АьбдурахIман Адамовлуйн.

Ва хьунабакьаврил сиптачитал хьуну бия Адан Раджабов, Жабир Абакаров, МахIаммадаьли Аьлилов ва Сагид ХIусайнов. Хьунабакьаврий цаягу лях гьан къаивтун, цинявннахьхьун махъру буллай, усттарну мажлис бачин бувну ия Жабир Абакаров.
Школа къуртал бувну махъсса выпускниктурал оьрмулия цащава кIул бан бювхъумур бувсунни Муттинхъал МахIаммадаьлил.
Дагъусттаннал шяраваллил хозяйствалул институтрал зоотехнический факультетгу къуртал бувну, ва зий ур Республикалул элмийсса Аграр центрданул ризкьилул отделданул хьхьичIунма пишакарну. Шанна шинай ва ивкIун ур Б. Аминовлул цIанийсса Хъусращиял СПК-лул председательну. 1984 шинал къуртал бувну бур аспирантура, хьуну ур шяраваллил хозяйствалул элмурдал кандидат.
Ва выпускраву хьхьичIунну дуклай бивкIминнавасса ца ур Акбархъал Жабир. Школа къуртал бувния махъ ванал язи бувгьуну бур летчикнал пиша. Къуртал бувну бур Рязаннал областьрайсса Сасовский летный училище, Ленинградуллал граждан авиациялул академия. Жабирдул щала оьрму бавхIуну бур авиациялуцIун. Лайкь хьуну ур «Дусшиврул ордендалун», «Граждан авиациялул отличник» тIисса ва цаймигу хIукуматрал бусравсса наградарттан. ЦIанасса чIумал Жабир зий ур «Дагестан авиакомпаниялул» хъунама директорну.
Жабраил Жахаев, Ленинградуллал шяраваллил академиягу къуртал бувну, зий ивкIун ур Ленинградуллал областьрайсса шяраваллил хозяйствалул идаралий. 1987-1988 шиннардий химический разведкалул аьрали бигарду би­ттур буллалисса Киевский аьрали округрал разведкалуву зий ивкIун ур. Аьрали бигарду хьхьичIунну биттур баврихлу лайкь хьуну ур Киевуллал аьрали округрал чулухасса хIурматрал наградарттан, барчаллагьрал чагъардан ва «За спасение погибавших» тIисса медальданун.

Ражавхъал Щамхалхъал Адан, Дагъусттаннал политех институтгу къуртал бувну, цала пишалий зий ивкIун ур цал Дубкилив, яла Ухссавнил чулий.
Аьлла Исмяилхъал Амирхан, Выборгскаллал граждан авиациялул училищагу къуртал бувну, лехлай ивкIун ур Ми-4 вертолетрай 1-мур классрал борт-механикну, 22 шинал лажиндарай авиациялуву зий ванал лайкь дурну дур чIярусса наградартту. ЦIанакул Амирхан кулпатращал ялапар хъанай ур Пятигорск шагьрулий.
Къаллахъал Сагид 1971 шинал дуклан увххун ур Выборгскаллал граждан авиациялул училищалувун. Мугу къуртал бувну, зий ивкIун ур МахIачкъалаллал аэропортрай, Ми-1 ва Ми-8 вертолетирттай авиатехникну, хъирив лехлай айивхьуну ур АН-24 самолетирттай. Сагидлул къуртал бувну бур Дагъусттаннал политех институтрал инженер-технологнал факультет. 1998 шинал айивхьуну ур Ту-154 самолетирттай борт-инженерну лехлай. ЦIанасса ппурттуву Сагид «Дагестан» авиакомпаниялий зий ур.
Кала Аьвдуллагьхъал Гъа­зима­хIаммадлул къуртал бувну бур ДГУ-лул математикалул факультет.
ХIусайнова Забиратлул Ашттарханнал учетно-кредитный техникумгу къуртал бувну, зий бивкIун бур Банкрай. 1977 шиная шинмай Авиаагрегат завод­рай завскладну, товароведну, инженерну. Махъсса шиннардий завмагну.

Разакьхъал Данияллул ва (Камун) Рамазанхъал Шамиллул къуртал бувссар Харьковуллал дуки-хIачIиялул институт. Шамил зий уссия Москва-Сочи ресторандалул директорну.
Чаллахъал Барзанатлул, Айгунова Таибатлул Дагъусттаннал ПаччахIлугърал университет къуртал бувссар. Барзанат , цаппара шиннардий зий буссия Хъусращиял школалий ­оьрус мазрал дарсру дихьлай. Барзанатлул ласнал ппу АхIма уссия школалул библиотекарьну. Гаджи-аьлихIал СахIилуягу филогог хьунни. Оьмар­шалгу Политехнический институт къуртал бувссар. Къизлардал райондалийсса Кардановка шяравусса школалул директорну зий ур ХIажиабакархъал Бадави. Утти вай чIявуми пенсиялийн бувккун бур.

– Жул классраву дуклакисса оьрчIру, душру кувннан кув ххирасса, хIурмат бусса бия. Школалийсса чIумалгу жу учительтуран, нитти-буттан сси бизан­сса тIул къадурссар. ХIакьинусса кьининин, хъис хIура къадурккун дур жул дусшиву. Тания шинмай бачIи оьрму лавгун бухьурчангу, дахьва школа къуртал бувсса кунма бура. Ва хьунабакьаврих ссавур дакъа ялугьлай буссияв. Ца ххарину бура ттущала архIал дуклай бивкIминнащал хьунабавкьуну.

Барчаллагьрай бура жува цачIун бан сиптачину бувксса цинявппагу одноклассниктурайн, – тIий бия Аданхъан Пат1имат. Ва школалийгу, шяравугу яла я бацIанмур ва сий думур душ буссия жул дянив тIий буслай бур выпускниктал. Ва выпускраву Хъусращиял школа къуртал бувну бур Закирхъал Рамазаннул ( ванал ппугу шяраву цIанихсса зюннавчи икIайссия), ТIурхIу-Хизрихъал Х1абибуллагьлул, Магьдихъал Санипатлул, ЖахIпархъал ХIалиматлул, Татаев Аьвдуллагьлул, Барихъал Аттал, Яркьи-Сулайманхъал Паткал, Зявзи-Кьурбанхъал Сураял, Сулиев Жамалуттиннул, хIакьинусса кьини шяраву хъунмасса захIмат буллай ялапар хъанахъисса Акахъал Качардул, Кавсаратлул, Оьмахъал Аьйшатлул. Аьйшат дарсру дихьлай бур Хъусращиял школалий.

Ва дия чIявусса пагьму-гьунар бусса оьрчIру ва душру итабавкьусса выпуск. Гьарная личIи-личIину бавцIуну буслан къахьунссар, щак бакъар вай цинявппагу бусан-чичин лайкьсса инсантал бушиврий. ХIарачат банна вайннащал цаща-цащалва хьунабавкьуну, ихтилат бан.
Мажлисрал сий гьаз дунни цIанихсса музыкант, композитор, балайчи, ДР-лул культуралул лайкь хьусса зузала Карин Кьадинаевлул ва РайхIанат ХIажиевал.