Райондалул жяматрансса бахшиш

[dropcap]А[/dropcap]ьвдулмажид МахIрамовлул кIицI лавгунни райондалун му машина пишкаш бан савав хьушиву зунттал щархъавусса жяматращалсса хьунабакьавурттай итталун багьай­сса ца яла цIюрувкьумур экология дуруччаврил масъала. Цинявннан чIалачIисса куццуй, ччюрклил масъала зунттал щархъаву ца чулийн буккан бувну бакъар.

ЦIанасса чIумал ччюрклил дурцIуну дур щархъавусса ратIру ва нехру. Вай хIала духлай дур шагьрурдал ва районнал шяраваллал агьалинал щин ишла дуллалисса хъуни­сса неххардивухгу. Мунияту аьркинну бур, ратIру, нехру нани­сса бакIщаращуя байбивхьуну, марцIшиву дуруччин.

– ХIакьинусса кьини щархъавусса неххардил, щаращал щинну чапал хьун къаритаврил ялув жува къабацIарчан, цаппара хIаллава жущара неххардийсса щин ишла дуллан къахьунтIиссар. Мунийн бувну ттун пикри хьунни зунттал щархъавусса экология дуруччаврил чулухуннайсса даву дачин дуллан.

[dropcap]А[/dropcap]йивхьура нава лявхъусса Ккуллал райондалия. Вания тинмай райондалий ччюрк ххилантIиссар цIусса машиналий. Шиннардий цIинцI салкьи къадуллай, чара бакъа аьркинссар ми полигоннайн ххилан, – увкунни Аьвдулмажид МахIрамовлул.

Райондалул жяматран дур­сса ххаллилсса бахшишрахлу Аьвдулмажид МахIрамовлухь дакIнихтунусса барчаллагь увкунни Ккуллал райондалул администрациялул бакIчи Шамил Рамазановлул.