Гьарца затирттал паччахI – ччатI

Уттигъанну Вихьлив ттула хIаятрачIату арх бакъасса ккурчIав щябивкIсса арамтурал ттуйн аьрза бувуна:
–Вилгу, цайминналгу шаппа ччатI бувансса инсангу, сантгу духьурча, жул дакъархха мукунсса тагьар. Циванни Вихьуллал шяраваллил ттучандалийн, гьарца кьини къахьурча, кьини ляхвагу баххайсса ччатI къабукIлакIисса. БучIай Лаващату нюжмардий цал. Гайгу, ххуллийх кьавкьун, тIааьнну къабикIай, – куну.
Ва иширал хъирив излай, на цIуххаву дурссия Ваччавсса пекарнялуву ччатI шахьлахьисса инсаннахь.
– Шяраваллил администрациялул ттучандалийн циксса ччатI цумур чIумал аьркинссарив заявка дулурча, на биян булланна аьркинссаксса ччатI,– куну. Бувсуна мукунма ца буханка итабакьайшиву 25 къурушран.

На яла лавгссияв Вихьуллал администрациялийн. ТIайлар, ттун тикку бакIрайн къаагьуна шяраваллил бакIчи. Ия мунал хъиривчу. На ванахь бувсъссия ккурчIавсса арамтурал ихтилат­рая. Цалла чIун дакъахьурча, кIицI бувссия шяраву ушиву мяйя депутат, вайннайн тапшур буван бучIишиву, шяравусса тIювардайх ялтту бувккун, циксса ччатI аьркинну бурив кIул баву. ХIакьину, ттун кIулссаксса, Вихьуллал шяраву дур 135 тIюва.
Явара ва оьванмасса масъала бакъар. Учала бурхха: «ЧчатI гьарца иширал дайдихьур» тIисса.