Вай гьантрай Новостройрал трестрай ЦIуссалакрал райондалул бакIчи МахIаммад-ХIажи Айдиевлул агьали щинал дузал баврил хIакъиравусса совещание дунни «Новостроевское» ЖКХ-лул зузалтращал.
Совещание дан хьхьичI кьини щин нанисса бургъулий лявкъунни зиясса, бакьин бан багьлагьисса кIанттурду. Мунийн бувну ЦIуминалийсса щархъаву цаппара гьантрай дакъая щин. ЧIалачIисса куццуй, щинал бургъу, зарал банну тIий зия бувну бур. Ва ккаккан оьвкунни экспертътурайн ва ихтиярду дуруччай органнал зузалтрайн.
Авария хьусса кIанттурдай ацIра ссятрай зий бия МУП-рал зузалт ва цала хушрай зун бувкми. Бургъу бакьин бувну, щин нани дунни.
Амма щинал масъала щаллуну къуртал бувшиврун ккалли бан бучIину бакъар. Аьхъарав, Шушияв, ТIюхчарав, ЦIуссачIурттахь ва Чапаеволий уттигу бур дяхтта щин дакъасса къатри. Райондалул бакIчинал тапшур бунни багьана ци бурив кIул бан. МаслихIат хьунни, щин ччи-ччинал къадашланшиврул, магистральданучIансса ххуллу лакьин.
Совещаниялий мукунма гьаз бунни щинахсса арцу ва хьусса буржру булаврил масъала. Хъунама бухгалтернал бусласимунийн бувну, нанисса дачIи шинай ЖКХ «Новостроевское» МУП-рал бюджетрайн дуркIун дур 4117000 къуруш. Ва дачIи шинайсса бурж 5 миллиондалия ливчусса бур. Шиккува бувсунни ва масъалалул тагьар гьарица шяраву цукунсса дуссарив. Контролертурайн тапшур бунни ялув бацIан.
Ахирданий МахIаммад-ХIажи Айдиевлул тапшур бунни цала хъиривчу Аьли Исрапиловлуйн ва МУП-рал директор Асхаб Амиловлуйн ЦIуминалийсса юридий, промышленный ва цаймигу идарарттайсса буржру ххал бан.
Ва кьини гьаз бувсса масъаларттал хIасиллу дуллалисса батIаву дан кунни хъиривмур нюжмардий.
