ХIакьинугу ванал кIунттихь тIуркIу тIийнма бур каманча…

Июль зурул 1-нний 99 шин там хьунни Хъусращиял шяравасса Хъун дяъвилул ветеран ХIусайнахъал Саэдлун. Увсса кьини барча дан ваначIан увкIсса МахIачкъала шагьрулул мэр Салман Дадаевлул дуллунни Саэдлун «Почетный гражданин Махачкалы» тIисса хIурматрал лишан.

– ХIакьину ттуйн вихшала дунни Хъун дяъвилул ветеран Саэд ХIусайнаевлун «МахIачкъала шагьрулул хIурмат бусса гражданин» тIисса бусравсса цIа тапшур дан. На дакIнийхтуну ххарину увкIра хъярч-махсара ххира­сса, балайлул гьунар бусса, музыкалул чулухунай итххявхсса, ххишала акъа халкьуннан бусравсса ветеран барча ан.

Шиккува кIицI лаган, уттигу хIадур дуллай буссар ветераннан «Да­гъусттаннал культуралул лайкь хьусса зузала» тIисса бусравсса цIа дулун. ЧIал къавхьуну, жуна ххирасса ветеранначIан цал утти­гу бавтIун, му ххари уван­сса ца уттигу сант ххишала хъанай дур. Дяъвилул лажин ккарксса чиваркIуннал бакIрачIан дуркIсса захIматсса кьинирду тачIав хъамакъаритантIиссар. Вайннал дурсса чувшивур­ттая, хъирив нанисса никирангу кIулну бикIаншиврул, буржлувссару буслайнма бикIан, – увкунни Салман Дадаевлул.

ЯхIгу, чувшивугу жагьилминнаяргу ххишала дусса, аслансса дакIнил заллу ушиврийн бувну ивхьунссар Саэд вай шиннардил оьрмулийн. ХIакьинугу муша­къатсса ванал каниву тIуркIутIи бувнува буссар дяъвилийвагу личIи къавхьусса дакI тIайласса дус–каманча. Дяъвилийгу каманча бишлай, балайрду тIий, аьрали гьалмахтурал дакIру тяхъа дуккан дуллан икIайсса ивкIссар Саэд.

Ватандалийн душман ххявхсса чIумал Саэдлун диркIун дур 20 шин. Саэд ивкIун ур пехоталул полкрал пулеметчикну, гьуртту хьуну ур Чачаннал, Ингушнал, Украиннал ва Молдавиянал аьрщарай хьусса талатавурттавух. Лайкь хьуну ур Бу­ттал кIанттул цIанийсса Хъун дяъвилул орденнан, «За оборону Кавказа», «За боевые заслуги», «Трудовой славы» медаллан.