Дуклаки оьрчIал ацIния цара шинал лажиндарай бувсса захIмат вайннал лайкь бувсса марцIсса ххювардайсса аттестатирттал ва мусил медаллал тасттикь буллай бур. Вай гьантрай шадлугърал даражалийсса мажлисрай дуккавриву ва школалул жяматийсса давурттаву хьхьичIун ливчусса ва мусил медаллу лайкь дурсса оьрчIру барча бунни Ккуллал райондалул администрациялул бакIчи Шамил Рамазановлул.

Шамил Рамазановлул хьхьи­чIунну дуклакисса оьрчIан буллунни райондалул администрациялул чулухасса барчаллагьрал чагъарду ва арцуйнусса бахшишру. Ккуллал райондалий мусил медальданущал школа къуртал бунни Хъусращиял школалул выпускник Давдиев РахIим Анатолийл арснал ва Къяннал школалул выпускница Сутаева Гульмира Рустамлул душнил.
Школа къуртал бувминнан тIайлабацIу чIа тIутIисса ихтилатру бунни Шамил Рамазановлул ва КIулшивуртту дулаврил управлениялул хъунама Камил ТIилиевлул.

– Ххирасса оьрчIрув! Зу лайкьну лавхъунни оьрмулул цалчинсса шачIану. Мунин барашиннану хьунни хIакьину зун тапшур дурсса мусил медаллу ва хьхьичIунсса хIасиллащалсса аттестатру. Вай медаллаву ду­ссар зул учительтуралгу, нитти-бутталгу, зувагу шиннардил мутталий буллай бивкIсса захI­матрал хIасиллу. Умуд бур гихунмайсса оьрмулувугу зуяту райондалул цIа-кьини бюхттул дансса, пахрулунсса пишакартал хьунссар тIисса. ТIайлабацIу хьуннав зун гьарца бивзсса ша­ттираву! – увкунни Шамил Рамазановлул.
Мажлисрал ахирданий выпускниктурал рирщунни дакIний личIансса суратру.