Кьунттуйсса гюнгутIи-тIутIив

Инсаннал оьрмулул кьинирду дикIай оьнна гьан дуллалиссагу, зуманицIун дияннин дурцIуссагу. КIицI дан ччи­сса ттулмур кьинигу хьуна диялну дурцIусса. КIюрххил шавату увккун, ЦIийшиял шяраваллил чIаравсса «городищалучIан» ияннин, кьини ссачма дакъасса патрондалул журалий най дия. Му чIумал Щуну-Зунттул кIиллува гьаз хьуна баргъ. Цакуну ттул янилун багьуна ххуллул чIаравсса ца кьунттуй, бургъил тIинттал пар-партIи бувсса, къавтIилуха лахьлахьисса тIутIал къатIа. Гай дия гюнгутIи-тIутIив.

Ургу яла ина, нава ганиннин цIаннавух най ивкIун, чаннайн увкни кунмасса иш хъанан бивкIуна. ЧIалан диркIуна лагмасса зунттал хъачIунттал хIасул дурсса суратру. Янилун дагьлан диркIуна цаймигу хъиннура исвагьисса тIутIив. Миннувух ягинну чIалай дия тунтну ятIулсса, вичIилусру кунна­сса тIутIивгу. Дия ххуллул зума-къирагърай гулмадарангу. Гайннул бакIру кIяласса ва наранжи­сса дия. Ппиринж-тIутIал хъиннура лухччи авадан дувай. На вайннувасса ятIулми тIутIал бакIру, дартIун, кьакьан дувара, чяйлийн дичин. Вай къюкIлин хъин­ссар тIар. «Городищалул» чарттал ххюлубакIурдугу сурат дихьул пилчлул ххуттардиха лахьлай бия.

Хьунадаркьуна макьу цахъи зия дурсса лишангу. ЦIийшиял ахъувусса мурхьирая биян бувасса гьивч бия, бивттуну, щяв экьибивчуну. Битияра гьивч бияннин!
Вай дия хъинну баргъ бивт­сса кьинирду, зунттал бакIругу марххалттаницIа марцI шавай дия.
Бунияла, га кьунттуй янилун багьсса гюнгутIи-тIутIал къатIуя хIасул хьусса кьавтIилул га кьини чанна дурну, буван ччай бивкIми ишругу бартлавгуна. Бартлагаваннав зул дакIниймургу!

Читайте также: