Уттигъанну Белоруссиянал шагьрурдай, Минскалий ва Брестрай, хьунни Буттал кIанттул цIанийсса Хъунмасса дяъви байбивхьуну 80 шин шаврин хас бувсса Дунияллул халкьуннал дянивсса аьрасатлувтурал форум. Стамбуллайсса Аьрасатнал кIулшивуртту дулаврил обществолул Оьруснал центрданул чулуха форумрай гьуртту хьунни жула АхIмад АхIмадовлул арс Эврен. Жагьилтурал лидер ва активист Эвреннул даража ва лайкьшивуртту хIисавравун ларсун, форумрай гьуртту хьун ва язи увгьунни.
Шиккун бувкIун бур 40 билаятраясса инсантал. Миннавух бия дазул кьатIув ялапар хъанахъисса дунияллул халкьуннал дянивсса арардал ва дипломатиялул пишакартал, волонтертурал, ветерантурал ва жяматийсса организациярдал, Аьрасатнал ватанлувтурал координациялул советирттал вакилтал ва дазул кьатIув зузисса Аьрасатнал СМИ-лул зузалт.
[dropcap]Ф[/dropcap]орумрал девиз дия «Победа будет за нами!» тIисса. Ванил мурад бия дазул кьатIув жула тарих буруччаврил, КIилчинмур дунияллул дяъвилул ва Буттал кIанттул цIанийсса Хъунмасса дяъвилул тарих баччан бан къабитаврил цIаний зузисса Аьрасатнал диаспоралул потенциал ккаккан баву.
Шикку гьуртту хьун бувкIминнаща бювхъунни экспертътуращал хьунабакьин, цаламур пикри-зикри бусан. Ва масъалалуцIун дархIусса дискуссиялуву гьуртту хьунни конституциялул законодательстволуха ва паччахIлугърал строительстволуха зузисса Аьрасатнал Федерациялул Советрал комитетрал член Елена Афанасьева ва Аьрасатнал журналист Евгений Примаков.
Тамаша бансса дия Турциянаву зузисса «Волонтеры Победы» дунияллул халкьуннал дянивсса командалул проектрал презентация. Презентация дунни Нина Йюкселлул. Мунил хъирив ва командалувун хIала хьунни цIу-цIусса шагьрурду ва билаятру. Брестрай форумрайн бувкIминнал ххал бунни тIивтIусса музей.
Шикку рартIун дур Польшанава лавсун бувкIсса совет заманнул гьайкаллу. Музей Белоруссиянал агьалинал арцуцIух зий бур.
«Брест къала-виричу» мемориал комплексрачIа хьунни митинг. Укунсса митинг-реквием шикку аьдатравун дагьну дур. Ва дайдишай ссят 3.30 мин. хьусса чIумал июнь зурул 22-нний.
Жагьилтуран хъинну асар хьунни Буттал кIанттул цIанийсса Хъунмасса дяъвилул иширттан хас дурсса реконструкция. Азарахъул инсантал бувкIун бия шиккун къала буручлай жанну дуллуми дакIнийн бичин, 80 шинал хьхьичI немецнал гьужум байщун бан хьхьичIва-хьхьичI данди бавцIусса вирттаврал аьпа учин.
2021-ку шинал Аьрасатнал КIулшивуртту дулаврил, культуралул ва иширттайнусса хIала-гьурттушиврул обществолун 16 шин шаву пандемия сававну онлайн режимрай кIицI ларгунни.
Гьурттучитуран ккаккан дунни конференциялиясса ролик, вайннал бувсунни цала пикрирду Ильбер Ортайлыл ва профессор А. Ибрагьимовлул бувсса ихтилатирттал хIакъираву. ЧIал къавхьуну ва иш кIицI лагантIий бур Оьруснал центрданий. Пикри бур литературалул клубрал ирглийсса заседание дан.
[dropcap]П[/dropcap]андемиялуцIун бавхIуну Турциянавусса мероприятияртту дуллай бур чансса инсантал гьурттуну. Ва хьунабакьаврий ихтилатру бантIий бур шаэртурал, чичултрал. Миннал кIул бантIиссар шикку гьуртту хъанахъими цала произведениярттащал.
