ОьрчIру буруччаврил кьинилун хас дурсса байрандалия махъ, райондалул администрациялий хьунни Даниял Бугъановлул активращалсса хьунаакьаву.
Райондалул бакIчи Юсуп МахIаммадовлул бувсунни Даниял Бугъанов райондалийн тIайла увккун ушиву ПаччахIлугърал секретарь Хизри Абакаровлул. КIицI лавгунни Аьрасатнал ПаччахIлугърал Думалувун цIа ришлашисса бувчIавурттай райондалул агьалинал хъунмур вихшала Хизри Абакаровлуйн дурну, ганахлу буллушиву чIявуми чIурду.
Муния махъ Даниял Бугъановлул вичIи дирхьунни агьалинал кIицI буллалисса масъаларттах.
Гъумучиял шяраву ялапар хъанахъисса Хайруттин ХIусмановлул кIицI лавгунни махъсса шиннардий паччахIлугърал хъуннасса къулагъас дуллай бушиву ххуллурдах, му къулагъас асар хъанай душиву зунттал районнал агьалинангу.
ЦIахъарату Гъумукун нанисса ххуллий 1987-ку шиналва бивхьусса асфальт тIавтIун бушиву буслай, тавакъю бунни ва масъалалух къулагъас даву.
Райондалул счетная палаталул хъунама Явсупи ХIамзаевлул бувсунни Федерал инвестицион проектрал лагрулий 2019 шинал буллай байбивхьусса ШавкIрату Щаравсса ламу бацIан бувну бушиву, кIикку хъякрурду ялун лирчуну дуну тIий. Тавакъю бунни давуртту цIу дуккан дансса кабакьу баву.
Райондалий хIакьинусса кьининийнгу агьамнува личIлачIисса буруккин – газ буцаврил ялув Юсуп МахIаммадовлул кIицI лавгунни пандемияцIун бавхIуну давуртту махъун дагьну душиву. Газ буцаврил масъала цалийн багьну бушиву, агьалинан багьлай бушиву ттигу чансса ссавур дан.
Даниял Бугъановлул бувсунни кIицI лавгсса мурадру ПаччахIлугърал Секретарнайн баян бантIишиву.
