«Горец» тIисса МахIачкъалаллал ОМОН сакин бувну 30 шин бартлаглагисса шадлугърал мажлис хьунни МахIачкъалалив, кьюкьлул базалий. Шикку гьуртту хьун бувкIун бия Росгвардиялул Ухссавнил Ккавкказуллал округрал хъунаманал хъиривчу – техникалул ва ярагъуннил хъунама генерал-майор Игит Менафов, отрядрал нукIувасса командиртал: отставкалийсса милицанал полковник Щамхал ХIаммадов, Аьрасатнал Виричу отставкалийсса милицанал полковник Загид Загидов, полициялул полковник Микаил Маккашарипов, отставкалийсса полициялул полковник Макка Кьурбанов, отрядрал ветерантал, аьпалухьхьун лавгсса зузалтрал кулпатру, шагьрулул администрациялул, личIи — личIисса министерстварттал ва ведомстварттал вакилтал.
Мажлис тIитIлай, зузалт байрандалущал барча буллалисса ихтилат бунни Аьрасатнал Виричу, Дагъусттаннал Росгвардиялул управлениялул хъунама полициялул генерал-майор МахIаммад Баачиловлул. Ванал бувсунни отрядрал цIанихсса тарихрая.
Дагъусттаннал ОМОН сакин бувну бур 1991 шинал июнь зурул 4-нний яла хьхьичIунми, итххявхми милицанал зузалтрая. Цалчинсса гьантрайва подразделениялул зузалт чялишну гьуртту хьуну бур региондалий жяматийсса низам ва мюхчаншиву дуруччаврил давурттаву, мукунма ФСБ-лул ва МВД-лул зузалтращал личIи- личIисса хасъсса операциярттаву: 1991-ку шинал МахIачкъалалия арх дакъа самолет ЯК-40 дагьсса чIумал, 1-мур СИЗО-луву ва МахIачкъалаллал аэропортрай ширишилун бувгьуми тархъан буллалисса чIумал, 1994-1995- ку шиннардий МахIачкъалаллал автовокзалданий ширишилун бувгьуми ххассал буллалисса чIумал. Му бакъассагу, отрядрал зузалт гьуртту хьуну бур 1996-ку шинал январь зуруй Къизлардай ва Хасавюртуллал райондалийсса Первомайское шяраву хьусса иширттаву, 1999-ку шиналсса дяъвилул иширттаву.
30 шинал лажиндарай ОМОН-далул зузалт гьуртту хьуну бур террорданийн къаршисса 336 операциялуву, оператив-ххалбигьавуртту дуллалисса 1024 мероприятиялий, жяматийсса низам дуручлачисса 1360-нния лирчусса давурттаву. Отряд сакин хьуния шиннай къуллугърал бурж биттур буллай жан дуллуну дур 58 инсаннал. 187 зузалайн щавурду дирну дур. Миннава 58 мушакъат хьуну ур. Къуллугърал бурж биттур буллай ккаккан дурсса чувшиврухлу 253 зузала лайкь хьуну ур ведомствалул ва хIукуматрал наградарттан.
Миннава ца – отрядрал командир Загид Загидов, лайкь хьуну ур Аьрасатнал Виричунал цIанин, 110 – Къучагъшиврул ордендалун ( 39 аьпалул хьуну махъ), 66 зузалан дуллуну дур «За отвагу» медаллу.
Подразделениялул зузалт барча буллалисса ихтилатру къуртал хьуну махъ, къуллугърал бурж бартбигьлай жанну дуллусса зузалтрал аьпалун минутрайсса пахъ багьаву баян бунни. Хъирив миннан дацIан дурсса гьайкалдануцI дирхьунни тIутIив.
Мероприятиялул лагрулий хьхьичIунсса зузалтран дуллунни ХIурматрал грамотартту ва арцуйнусса бахшишру.
Отрядрал зузалтрал ккаккан бунни хъамаллурал хьхьичI цала хIадуршиндарал ва пишакаршиврул даража. Мероприятие наниссаксса хIаллай ккаккиялун дирхьуну дия отрядрал техника ва ярагъ, тIивтIуну бия полевая кухня. Ахирданий мероприятиялий гьуртту хьун бувкIминнан ккаккан дунни ххаллилсса концерт.
