Июньдалул 16-нний Гъумук, Культуралул центрданий, хьунни лакрал халкьуннал балай щаллу буллалиминнал дянивсса Мариян Дандамаевал цIанийсса конкурс. Ва сакин дурну дия Дагъусттан Республикалул Культуралул министерствалул ва Республикалул Халкьуннал творчествалул къатлул, Лакрал райондалул администрациялущал ва Культуралул, жагьилтурал политикалул, туризмалул, физкультуралул ва спортрал отделданущал цачIуну.

Шадлугъ дайдихьлай, ихтилат бувна райондалул Культуралул, спортрал ва жагьилтурал политикалул управлениялул начальник Ансар Къажлаевлул. Конкурсрал гьурттучиталгу барча бувну, миннан тIайлабацIугу чIа увкуну, кIицI лавгуна ва конкурс, Гъумук гьар шинал дуллай, аьдатравун дагьанссар тIисса умуд бушиву.

Конкурсрай гьуртту хьунни Лакрал, Ккуллал ва ЦIуссалакрал районнаясса балайчитал. Миннал гьунардан кьимат бишлай бия хIурмат лавайсса жюри. Муниву бия: Дагъусттан Республикалул искусствардал лайкь хьусса ишккакку, композитор, Дагъусттаннал Композитортурал союзрал председатель Рамазан Фаталиев, Аьрасатнал Федерациялул искусствардал лайкь хьусса ишккакку, Дагъусттан Республикалул халкьуннал артист, профессор, Дагъусттаннал Музыкантътурал союзрал председатель Хан Баширов, композитор Аскерхан Аскерханов.

Конкурсрал хIасиллу дуллай бувсса ихтилатраву жюрилул члентурал хъинсса мукъурттийну, бусраврай дакIнийн бувтунни бусалардавун багьсса Мариян, цил аьпа оьрмулул хъуниминнал буручлачисса ва махъа нанисса никиралгу цил балайрдах гъирарай вичIи дихьлахьисса, бала-апатIрайну оьрму бяливчIун циксса шинну гьарчагу, халкьуннал дакIурдивату къабувксса. Мариян Дандамаеващал кIулну бивкIсса вайннан бусанмургу чансса бакъая.
Цалчинмур даражалул Лауреатнал дипломру буллунни Шамсият Какваеван (Лакрал район), МахIад Гудовлун (Ккуллал район). КIилчинмур даражалул Лауреатнал дипломирттан лайкь хьунни Мариян МахIаммадова (Ккуллал район) ва Родна ХIасанова (ЦIуссалакрал район). Шамилчинмур даражалул Лауреатнал дипломру буллунни Мариян Жамалуттинован ва ХIалимат Юсупован (Лакрал район).