Щаллагу дунияллий кIицI лагайсса ОьрчIру буруччаврил кьини Дагъусттаннал паччахIлугърал медициналул университетрал ректор Сулайман Маммаев бакIчисса хъамал бивунни «Забота» тIисса цIанилусса Къатлувун-интернатрайн.

ДГМУ-лул студентътурал хIадур дурну дия, оьрчIру бялахъан баву мурадрайсса, аниматорталгу гьурттусса программа. ОьрчIайх дарчIуна бахшишругу.
Хъирив интернатрал директор Ума Качаловащал хъамал бувккуна циняв отделенияр­ттавух, яхши-хаш бувна идаралул тарбиялувтуращал. Ванилгу, Сулайман Маммаевлулгу икьрал дуруна «Забота» интернатрал базалий тIитIин ДГМУ-лул волонтертурал корпус, ва корпусгу щаллу буван педиатриялул факультрал студентътурая.
Ума Качаловал цилвамур ихтилатраву чIурчIав дуруна студентътурал-медиктурал кумаграх цивппа хъинну мюхтажну бушиврий, хаснува шания бизан къашайсса оьрчIру бусса «цIимилулмур отделениялий».

Сулайман Нураттиновичлул кIицI лавгуна хаснува укунсса кIанай бюхъантIишиву волонтертураща цала бюхъу-гьунар ккаккан буван. ДГМУ-лул Волонтертурал центрданул каялувчи Эльмира Мажидовайн ванал тапшур бувунни шикку зунсса волонтертурал корпус щаллу буван ва«Забота» интернатравусса даврийн студентътал хIадур буван.
Интернатрай волонтертурал корпус тIитIаврицIун дархIусса давуртту щаллу дувантIиссар 7-10 гьантлул дянив. Мукунма щаллу бувантIиссар волонтертал интернатрайн биян буллан­сса ва буцлансса транспортралмур масъалагу.

ДГМУ-лул каялувшиндарал ва миву дуклакиминнал ва интернатрайнсса аьрххи цалчин­сса ягу нажагьсса бакъар. Вай чIявуну бияйссар шиккун ва шивусса оьрчIал вай мудангу хьунабакьайссар цала ччянивасса дус­тал кунма.