МахIачкъалалив лавгсса бигьалагай гьантрайн тIайла дарцIусса Аьрасатнал Кьинилун хасъсса шадлугъру най дия личIи-личIисса майданнай.
ХIасил, хъуншагьрулул дязанний, Дусшиврул къатлучIату тIайла хьуну, хьхьирицIсса паркравун бияннин, ча-чунгу тяхъашивуртту, балайрду ва къавтIавуртту дия. Шагьрулул агьалинан ва хъамаллуран тамашалун шаэр А. Къапиевлул бюст бацIан бувсса скверданий сакин дурну дия республикалул жагьилсса художниктурал суратирттал выставка.
Кьинилул мутталий лахъи ларгсса шадлугъирттая махъсса агьаммур шадлугъ хьуна МахIачкъалаллал хъун майданнив, Аьрасатнал Федерациялул Национал гвардиялул аьралуннал балайрдал ва къавтIавурттал академиялул ансамбльданул концерт дуваврийну. Аьрасатнал Кьиблалул ва Ухссавнил Ккавкказуллал регионнайх гастроллай заназисса ансамбльданул аьрххигу тIайла бавцIуну бия байрандалул кьини Дагъусттаннайн. Майданнив бацIан бувсса сахIналул хьхьичI щябивкIми бакъасса, кIанттурду биял къавхьуну, укунма бавцIусса, ансамбльданул артистътурал гьунардах бурган бувкIсса тамашачиталгу чансса бакъая.
Концертрал программа вайннал дайдирхьуна Хъун дяъвилул шиннардил балайрдаяту ва гихунмай щаллу бувна хъиривми шиннардий совет халкьуннан ххира хьуну бивкIсса балайрду ва къавтIавуртту. Увкуна артистътурал хорданий, Расул ХIамзатовлул мукъурттийсса ва Мурад Къажлаевлул макьандалийсса, чIявучин кIулсса «По горным дорогам» тIисса балайгу.
Концертрал хъирив, АьФ-лул национал гвардиялул аьрали ансамбльданул артистътурахь ва ванил каялувчи, генерал-майор Виктор Елисеевлухь Дагъусттаннайн бучIаврихлу ва Аьрасатнал кьинилул байран чIюлу даврихлу сахIналия барчаллагь увкуна Республикалул БакIчи Сергей Меликовлул ва кIицI бувна ххаллилсса ва уттинин яла цIу къизгъинний талай бивкIсса жула аьралуннал хьхьичIгу концертругу сакин дурну, лахъсса аьрали наградарттан лайкь хьусса артистътурал коллектив бушиву.
Шиккува кIицI лаган, Росгвардиялул ансамбльданул гастроллу билаятрал регионнай най дуссар Низам дуруччаврил аьралуннан 210 шин хьусса тарихрал иширан ва АьФ-лул национал гвардиялул аьрал сакин бувну 5 шин хъанахъисса чIирисса юбилейран хасну.
