ОьрчIру буруччаврил кьини хъин хъамаллуращал

Лакрал райондалий лавайсса даражалий кIицI ларгунни ОьрчIру буруччаврил кьини.

Гъумучиял кIивагу детсадрай хьунни ва байрандалун хас дурсса шадлугъру. Шеърирду ккалай, балайрду тIий, къавтIий, магьравасса сценкарду бихьлай, оьрчIру ккаккан буллай бия цала гьунарду.

Райондалул лагрулийсса агьаммур байран тIурча, хьунни хьхьичIвасса лицейрал майданнив.
Ва базилух Лакрал райондалул оьрчIру барча бан увкIун ия ДР-лул ПаччахIлугърал секретарь Хизри Абакаровлул кумагчи, Аьрасатнал каратэлул федерациялул вице-президент Даниял Бугъанов.

Ванащал бия республикалул цIанихсса спортсменталгу: Аьрасатнал лайкь хьу­сса тренер Оьмар Муртузалиев, дунияллул халкьуннал дянивсса классрал спортрал мастер Рашид Юсупов, «Ахмад» лигалул чемпион МахIаммад Анкалаев, хIаладурхсса биявурттал чемпион Загит МахIаммадшарипов, Дунияллул кубок лавсъсса МахIаммад МахIаммадов ва чIявусса цаймигу.

Бусравсса хъамаллурахь ала-ссаламгу бувну, ми шадлугърайн бавтIминнащалгу кIул бувну, оьрчIахь байран барча тIий,райондалул бакIчи Юсуп МахIаммадовлул увкунни:
– Ва кьини жунма, хъуниминнан цал ххину дакIнийн багьай хъун хъанахъисса никирах къулагъас ва аякьа ххи дан багьлай бушиву, миннал ихтиярдал хIурмат бикIан аьркиншиву, миннал гьунттийсса бучIантIимунил ялув жаваблушинна душиву.

ОьрчIру – жулла аваданшивур. Вайннал цIанийру жува дунияллий оьрму бутлатисса, захIмат буллалисса, бучIантIимунил ялув пикри буллалисса. ОьрчIшиву дуруччиншиврул яла аьркинмур цIуллушиву ва бавкьусса кулпатри.

ОьрчIал оьрму тяхъагу, ххуйгу бан – му кулпатрайсса, жямат­райсса ва паччахIлугърайсса буржри. ОьрчIал кIунттихьхьун жува тапшур буллай буну тIий жула ялун бучIантIимур. Вайннал кумаграцIухри жущара хIасул дан хьунтIисса инсансса, тIайласса ва тIайла дарцIусса общество.

Чансса дакъар райондалул оьрчIал ва чIаважагьилтурал спортшколалулми хьхьичIу­ннайшивурттугу. Аьдатравун дагьну дур райондалий оьрчIал спортрал бяс-ччаллу буллалаву. Микку ххув хьусса оьрчIал ккаккияртту хьхьичIунсса шай республикалул ва кьатIувсса бяс-ччаллайгу.

– Вай гьантрай Лаващиял райондалий хьусса оьрчIал ва чIаважагьилтурал боксрал бяс-ччаллий жула райондалул командалул бувгьуну бур арулва цалчинмур, шанма кIилчинмур ва кIива шамилчинмур кIану. Ва хъунмасса тIайлабацIур, жула пахрулунсса», – цала увкумунил ялун ххи бунни ялагу Юсуп МахIаммадовлул.

КIицI лавгунни райондалул администрация ванияр тихунмайгу хъуннасса къулагъас дуллантIий бушиву оьрчIру дуккавриву, творчествалуву ва спортраву хьхьичIунну бикIаврих. Бувсунни сентябрь зурул 1-нний райондалий нузру тIитIинтIий душиву цIусса, ттизаманнул тIалавшиннардацIун гьарца чулуха бавкьусса школалул. Райондалий хIакьинусса кьининийн цавагу къаливчIун бушиву гьарца шартIру дузал къадурсса школа.

ОьрчIру барча буллай, Даниял Бугъановлул бувсунни цува райондалийн тIайла увккун ушиву Дагъусттан Республикалул ПаччахIлугърал Секретарь Хизри Абакаровлул, агьалинащал хьунавакьуну, мурадру, масъалартту ххал бигьин, миннал буруккинттащал кIул хьун.
– Аьрххи ОьрчIру буруччаврил кьинилийн тIайла бавцIунавхьур, ттущал бучIан ччан бивкIуна жула цIанихсса спортсментурангу, цанчирча вайннан кIулссар цивппа зул кумиртал бушиву, – увкунни Бугъановлул.

Райондалул администрациялул хIадур дурсса шадлугърай хъуннасса гьурттушиннагу дурну, оьрчIру бялахъангу, бигьалагангу бунни хъамаллуращал бувкIсса аниматортурал.
Цала гьунардайну хъамал ххари бунни Гъумучиял оьрчIал магьирлугърал школалий тарбия хъанахъиминналгу.

Шадлугъ къуртал шайхту, Юсуп МахIаммадовлул бахшишру дуллунни опекунтурачIа тарбия хъанахъисса оьрчIан. Гъумучиял спортшколалун цала чулуха инвентарь пишкаш дурунни Даниял Бугъановлул.

Му бакъассагу, ванал райондалий ялапар хъанахъисса мушакъатсса 6 оьрчIан дуллунни Сулайман Каримовлул цIания кумаг­рансса 50 азарда къурушрал сертификатру.

Читайте также: