[dropcap]М[/dropcap]ай зурул ахирданий Къяннал шяраву дия дакI ххари дуллалисса уттарашинна. Му уттарашиндаран цIагу дия «Къяннал кьини» тIисса. Жула миллатрал дянив тачIавгу чанну къабивкIссар цува лявхъусса кIану ялун нанисса никирахьхьун сагъ-саламатну тапшур бан бюхъайсса чиваркI. Гьай-гьай, махъсса шиннардий аьлтта чIалай бур зунттавусса агьали чан хъанай бушиву. Му иширансса багьанану хъанай бур ший яхъанахъисса инсантуран давуртту дакъашиву.
Къяннал жяматрал лайкьсса арс, патриот Шяпи Оьмаровлул щаллу дурну дия ва шадлугъ. Ванил хъунмур мураднугу бия Къяннал инсантуран цала буттал мина дакIния гьан къаритаву, зунттал шаращал щин кунма зумух гъалгъатIи бан бюхъайсса лакку маз хъамабитан къабитаву, мунихсса ччаву ххишала хьун даву, шагьрулийсса хьуннав, шяравусса хьуннав оьрчIру, душру кувнан кув хъиннува гъанну кIул баву.
ДакI ххари дуллалисса ишнугу бия, бугьараминнаяр жагьилми, мюрщими чIявусса бушиву му Кьинилий.
Шяраваллил администрациялул хьхьичIсса кьанив, лагмава муххал тталлугу бивщуну, хIасул бувну бия инсантал щябикIансса кIану. Шяпинал бувсуна мукьахунмайгу вай тталлацIун махругу рирщуну, жяматрал муданмасса ишру дузал буллансса кIану бан пикрилий бушиву.
Ца мурцIувгу бувантIиссар тIива чIивисса къатта. Хъинну ххуйсса пикри дакIнийн багьну бур Шяпинан.
Шяпи Оьмаров увну ур 1954-ку шинал Къянив. АцIва класс бувккуну махъ, къуртал бувну бур Грозналлал Навтлил институт. Зий ивкIун ур цала касмулийгу, ишбажаранчинугу. Шяравугу ванал дурну дия ябацIансса 2 зивулийсса къатри.
Ссупралух щябикIаннин, шяраваллил баргъбуккавал чулий, ца кьасса рахIув хьуна спортрал тIуркIурду. Бия шикку лечаврил, пут личаврил ва лачIун буккаврил бяст-ччаллу. Бяст-ччаллаву ххуй хьуминнангу дуллай бия арцуйнусса бахшишру ва Къяннал шяраваллил сурат лачIун дурсса бейсболкартту. Яла щябивкIуна ссупралух. Шиккугу авадансса дуки-хIачIия дия. Увкуна балайртту, къавтIавуртту, цаймигу тяхъашивуртту. Ахттакьуннин лахъи ларгуна «Кьяннал кьини». ЦIуллу аннав ина, Шяпий, укун лахъа-хъунсса байранну агьалинан сакин дуллан. ОьрчIая, оьрчIал оьрчIая чани ккакканнав. Ина вила цIа Къяннал шяраваллил тарихрал луттирай чирчуссар.
