Июньдалул 12-нний, Аьрасатнал Кьини, Каспийск шагьрулийгу хьунни итталун дагьансса шадлугъру: Аьрасатнал Федерациялул национал гвардиялул балайлул ва къавтIаврил аьралуннал академический ансамбльданул концерт, культуралул ва бигьалагаврил Халиловлул цIанийсса паркравусса мажлис ва Лениннул кIичIираву цIусса сквер тIитIаву.
Росгвардиялул концерт
Шагьрулул хъун майданнив Аьрасатнал халкьуннал артист генерал-майор Виктор Елисеевлул каялувшиндаралусса Росгвардиялул балайлул ва къавтIаврил ансамбльданул ккаккан дурсса концерт хьунни низам дуруччаврил аьрал сакин бувну 210 шин ва Аьрасатнал Федерациялул национал гвардиялул аьрал сакин бувну 5 шин шаврин хасъсса гастроллал турданул лагрулий.
Концерт дайдирхьуна ансамбльданул солистка Наталия Елисеевал ва хорданул щаллу бувсса «Ты – Россия моя» балайлийну. Ва кьини майданнив бувкIсса тамашачитурал хъунмасса гъирарай вичIи дирхьуна ансамбльданул щаллу бувсса Хъун дяъвилул чIумул совет композитортурал чивчусса, мукунма оьруснал халкьуннал балайрдах. Ансамбльданул балетрал группалул ккаккан бувна къавтIаврил композициярдугу: «Домой с Победой», «Казачья пляска» ва «Золотая хохлома». Концерт щаллу хьуна хорданул ва оркестрданул щаллу бувсса «Прощание славянки» балайлийну.
Каспийскаллал шагьрулул каялувшиндарал чулуха ансамбльданул коллективрахь барчаллагь тIутIисса махъру лавхъуна шагьрулул Администрациялул каялувчинал хъиривчутал Руслан МахIмудовлул ва Арсен Велиевлул. Мукунма махъ лавхъуна контр-адмирал Каспийскаллал флотилиялул командующий Александр Пешковлул.
Шиккува кIицI лаган, ва коллектив хъанахъиссар билаятрал аьрали художествалул ца яла хъуними коллективирттавасса ца ва, 1973-ку шинал сакин бувсса, виваллил аьралуннал пишакарсса цалчинсса коллектив. Ва ансамбльданул ккаккан дурну дур 8 азарунния лирчусса концертру.
ЦIусса сквер
Лениннул цIанийсса кIичIираву ва кьини тIивтIуна цIусса сквер. ДР-лул тIабиаьтрал сурсатирттал ва экологиялул министр Рахман ХIамидовлул сипталийну, шагьрулул администрациялущал ва меценатътурал спонсоршивруцIух ва шинал апрель зуруй байбивхьуссар цIусса сквер буллай.
Ва кьинисса бусравсса хъамаллуравух бия Рахман ХIамидовгу, Каспийск шагьрулул бакIчи Борис Гонцовгу, шагьрулул мажлисрал депутатъталгу.
Сквер тIитIлатIисса шадлугърайн бавтIминнайх волонтертурал бавчIуна билаятрал ттугълил 500-ннийн дирсса лиссурду.
Шагьрулул паркраву
Каспийскаллал шагьрулул администрациялул ва Дагъусттан Республикалул ПаччахIлугърал секретарь Хизри Абакаровлул даврил Управлениялул цачIу сакин дурсса шадлугъ хьунни Халиловлул цIанийсса паркраву.
Шагьрулул агьали ва хъамал барча буллалисса махъ лавхъуна Дагъусттан Республикалул ПаччахIлугърал секретарьнал Управлениялул начальник Станислав Аристовлул.
Паркравун бавтIминнал яру ххари буллай дия шагьрулул ОьрчIал художествалул школалийн заназисса чIава художниктурал дирхьусса суратирттая сакин дурсса выставкалул.
Шагьрулул творчествалул коллективирттал ккаккан дунни жулла республикалул халкьуннал культуралул ва багьу-бизулул, никирая никирайн нанисса аьдатирттал аваданшиву чIалачIи дуллалисса личIи-личIисса номердая сакин хьусса концертрал программа.
