ЦIувкIул – централ телеканалданий

Ларгсса алхIаткьини «Россия-1» телеканалданийсса, Дмитрий Кисилёвлул «Вести недели» тIисса передачалий бувсунни Дагъусттаннаягу, туризм сантирай хьхьичIуннай хъанахъисса, ляличIисса аьдатру ядурсса, канил пагьмурду чIявусса зунттал билаят хIисаврай. Ккаккан дунни хьхьуттайх лахъаврил магьирлугърал кюру – 1-мур ЦIувкIуллал шяраваллиятусса сюжетгу. Ва сюжет дуваншиврул ВГТРК-лул корреспондент, Максим Киселёв ивссар ЦIувкIравгу. ХIатта хьхьуттайх лахъансса хIарачатгума бунни ванал. Дмитрий ( ва цувари «Вести недели» передача хIасул дурмагу) ва Максим Киселёвхъул фамилия ца духьурчагу, маччасса бакъар.

Щалвагу Аьрасатнал тамашачитуран ккавкссар ятIулсса чиллу-чухъраву Сулакьрал каньондалул ялтту архъандалийх лавхъун нанисса, машгьур­сса пагьламан Камил Маммаев, цувагу таразарагу каруннихь дакъа. Ккаккан бунни ЦIувкIуллал шяраваллиятусса танирасса киносуратрал бутIагу, ккурчIа, кIичIиртту буцIин бувну, шяраваллил жямат байрандалийн бувксса. Ва видеофильм Интернетраву хъинну машгьурну дур, хъуниминнал бувсмунийн бувну, ХIухчалтрал кьини кIицI лаглагисса байран дур. Халкьуннал чIявушиврул вихгума хьун хъанай бакъар, лажинни, ЦIувкIрав вайксса чIявусса агьлу яхъанай бивкIссарив тIий. Циван къабикIави! Тайннахха къутри дуллай, хьхьуттай гьунарду ккаккан буллалисса оьрчIал майдан бувцIуну, кIяла чIирттаравусса хъуни къужрал ккурчIа-чIиртту бувцIуну.

Азарилайгу, азаллий цалчингу хIайп! ХIайп тIутIаврияр ххишалагу бикIан аьркиннихха духра лагавайсса шяравалу ядансса чарангу.
– ДакIнийхтуну ххарира ттула маччачу, ттаттан цIа дирз­сса Камил централ телевидениялий ккаккан увну, гьунар бусса, нигь-ццах цирив къакIулсса жагьил ур. Му ­уссия, МахIачкъалаливсса Ленинград гостиницалия цайми лахъ къатрайн пагьламан дархIуну, хьхьуттайх лахъан ччай. Амма шагьрулул хъуниминнал ихтияр къадуллуна, нигьачIисса проект дур тIий. На райондалул, Да­гъусттаннал хъуниминнал, туризмалул министерствалул вакилтурал, ххуллурдал идарарттал хъуниминналгу му передача ххал дурхьунссар тIий ура. Таний 350-400 хозяйство ду­сса шяраву хIакьину дикIаннагу 30 хозяйство лирчIун дур.

Агар бусалардавун дагьсса шяравалу ккаккан ччисса туристътал буккарча, цукунсса ххуллурдайхри ми ЦIувкIрав биянтIисса? Чуври туристътал бацIантIисса? Туризмалул министерствалул ва райондалул хъуниминнал ка-кумаг бакъа, ци къулайсса шартIрур миннал дузал дувантIисса? – тIий ур ва передача ххал дур­сса жул цIувкIрачу, Поэззиялул театрданул директорнал хъиривчу Супиян Оьмаров. Дунияллий яла машгьурми журналлащал уртакьну зузисса журналист, путешественник, трэвел-фотограф Иван Дементиевскийл (дунияллий ва къаивсса мурцIувагу бусса ххай бакъара) ЦIувкIуллал шяраваллийн «Дагъусттаннал Мачу-Пикча» увкуна. На ваначIан чивчуссия, увагу ссал хIайран увра, инания дуниял ккарксса, ца-цасса караматирттал суратру рирщусса инсан ура куну. «ЯбатIин къашай­сса ххуйсса кIанттурдайсса шяравалу дия, авурсса зунттурдал карав, аьнтIикIану тIитIи даркьу­сса», – тIий ия.

Гьай-гьай, бакъар хIакьину ЦIувкIрав жяматгу чансса бакъасса, бакъар школалий оьрчIругу, чансса бакъасса. Цимигу шинни Камил Маммаевлул Каспийск шагьрулий цIувкIуллал искусство ла­хьхьин дуллалисса студия, школа тIитIин ччай. Туризмалул, спортрал министерствардал кабакьу бакъа, тIитIин къахъанай. Бакъар ЦIувкIуллал шяраву иш бавчусса, хъунисса предпринимательтал. Дунияллийх цIа ларгсса шяраваллицIа хьун бацIаву жулва яхI-намусрал кьамул къабуван аьркинсса ишну чIалай бур.
Июнь зурул 1-нний Камил Маммаевлул Хасавюрт шагьрулий хьхьуттайх лавхъун хIайран бунни шагьрулул агьлу. Ва хьхьуттай лахъазанну ласлай най ур цалсса, цIанихсса цIувкIуллал пагьламантурал цIа адаврай ядуллай, цалва биялалиймур буллай.

Патимат Рамазанова

Заслуженный работник культуры РД

Читайте также: