Ваца жува хъяврин буллалисса кунна, цаппарасса чIумул мутталий цахъи паракьатнугу диркIун, ттиратти утта дуклай сукку хьунни бала-хатIасса коронавирусрал цIуцIаву.
Аьлтта чIалай, жула дянивату му пандемиялул зевххунни муниннин сагъну-саламатну бивкIсса, ссалчIав лахIан къабансса кунма чIалачIисса дустал, уртакьтал, шяравучутал, дагъусттанлувтал.
Амма, му пашмансса суратгу жула янилу дунура, му цIуцIаврил щийчIав рахIму къабуллай бушиву бувчIлайгу бунува, жува ттигу-шилагу муних биччи бакъа ялугьлай буру, бурувччуну яхъанай бакъару.
Му цIуцIаву дацIан дан шайсса, дунияллул лагрулий ххуйну ххал бивгьусса вакцинагу жучIава бунува, жува анавар буклай бакъару мунил каши ишла дан, жувагу яхьуну, жулациригу мунил ххяппуща ххассал бан. Му цукунчIав бувчIин шайсса зат бакъар!
Райондалул бакI дургьусса къуллугъчи хIисаврайгу, му цIуцIаврил хъапа ттуйва ххал бувсса инсан хIисаврайгу, на лаизлай ура Лакрал райондалийсса цинявппагу агьалинайн, лаизлай ура цинявппагу лакрайн, дагъусттанлувтурайн: хъирив бивзун, бюхъайссаксса ччяни дувара вакцинация!
Дарув-дарман – му Хъунасса Аллагьналгу цала умматран мусаллатI бувсса затри!
Юсуп МахIАммадов,
Лакрал райондалул бакIчи