Июнь зурул 22-нний ссят 4.00 хьусса чIумал ЦIуссалакрал райондалий байбивхьунни «Аьпалул чирахъ» акция. 1941 шинал ва кьини, ва чIумал Германнал аьрал ххявхссар Совет Союзрайн, байбивхьуссар Буттал кIанттул цIанийсса Хъунмасса дяъви.
Дяъви байбивхьуну цалчинсса кьинива лекьа-пIякьу хьуссар 20-хъайсса шагьрурду, 100-хъул шяраваллурду. Гьашину 80 шин бартлаглагиссар та оьсса, кIусса дяъви байбивхьуну.
Тай захIматсса кьинирдугу хъама къаритан, Ватан душманная дуручлай жанну дуллуминналгу аьпалун ЦIуссалакрал райондалул 23-гу школалиясса Ххувшаврил волонтертурал, юнармейцынал, оьрчIал ва мюрщи жагьилтурал организациярдал лавхъунни аьпалул чирахъру. Ва акциялул сакиншинначитал хьунни райондалул КIулшивуртту дулаврил, мукунма Культуралул, жагьилтурал политикалул, спортрал ва туризмалул управлениярду.
– «Аьпалул чирахъ» акциялул мурад бур Ватан душманная дуручлай жанну дуллуминнал аьпа абадлий ябаву, ялун нанисса ник миннал эбратрай тарбия даву. Буссар жула билаятрал тарихраву цуксса чIун гьарчагу хъама къабитайсса ишру. Ялунгума, шинну наниссаксса, цал агьамшиву, бюхттулшиву хъиннура аьч хъанахъисса. Буттал кIанттул цIанийсса Хъунмасса дяъвигу, та дяъвилий совет халкьуннал ккаккан дурсса къучагъшивугу мукунсса иширттавассар.
Жува вай ишру абадлий дакIний битан аьркинссар, – увкунни Культуралул управлениялул хъунаманал хъиривчу Заур МахIаммадовлул.
Амина Юсупова
