Жулла республика гьуртту хьуссар «Широка страна моя родная…» тIисса ВГТРК-лул телемарафондалий. Дагъусттаннаясса сюжет ккаккан дурссар «Смотрим» тIисса онлайн-платформалий.
Программа цурдагу хас дурну дур хъунмурчIин жула чIяву миллатру ва чIярусса культурарду цачIун хьусса республикалун, цIаларгсса канил усттартуран ва ттуршрахъул шиннардий яхьусса жулла аьдатирттан.
Проектрал сайтрайн бувхминнахь ва Дагъусттаннащал кIул хьун гъира буминнахь шикку буслантIиссар ябатIин къашайсса караматсса зунттал тIабиаьтраягу, хъамалушин дан ххирасса агьалинаягу, канил магьирсса усттартурая ва миннал канила дурксса ва ккавкма хIайран уллалисса хъуслиягу. ЖучIанма бувкIсса туристътуран чIявуну Дагъусттан кIулну бикIайсса бур так Каспий хьхьирил зумардайсса пляжирттайну ва аьвзалзаманнул Дарбант шагьрулийну.
Ва проектрал мурад тIурча, зунттава нанисса гьалаксса неххардия ва жюружанттая, бюхттулсса зунттал бакIурдия ва пахъ дагьсса дарардая, аьвзалзаманнул чарттал къатрая ва зунттал халкьуннал багьу-бизулия буслансса бур.
