Гьунардал авадансса Хъусращиял шяраву дунияллийн бувккун бур лакрал магьирлугъраву ва литературалуву ккалли бансса кIану бувгьусса шама уссу: Чанкура, Камалуттин ва Рамазан.
ЧIярусса шиннардий «Илчи» кказитрал жаваб дулайсса секретарьну зий ивкIсса Рамазан Рамазановлул балайрду тIий бур лакрал ттизаманнул балайчитал.

Камалуттин КьурбанмахIаммадов тIурча, ия цIанихсса педагог-математик, шаэр, композитор, музыкант, балайчи. Дагъусттаннал музыкалул мусил фондраву яхьуну бур ванал цува авторсса балайрду. КIиягу ччяни жуятува батIул хьунни, аьпа баннав цал.

Чанкуран, цахьхьунна ттигу чIярусса шиннардий цIуллушиву дулуннав, ттигъанну там хьунни оьрмулул 85 шин. Дагъусттан Республикалул культуралул лайкь хьусса зузала, ванал цIа лакрал миллатран кIулли шаэршиврий ва журналистшиврий. АцIния ряхра шин дурссар ванал «Илчи» кказитрал Ккуллал райондалийсса корреспондентну зий.

Райондалий «Щунудагъ» телевидение тIиртIуну, му лакьинцIа, гьарца хьхьуну, лакран баяйссия Чанкурал пасихIсса лакку маз.

---

Ванал цала чивчуцири шеърирду цачIун бувну, итабавкьуну бур «ПархтIутIи» тIисса жуж. Ккалаккиминнан асар къавхьуну къаличIантIиссар лакку мазрал пасихIшиву ва нахIушиву, асардал аьчухшиву ва узданшиву, ччаврил марцIшиву, буттал аьрщарал аьзизшиву.
Музыка чичаврилгу, мандолина, чагъана, каманча бищаврилгу, балай учаврилгу пагьму ххисса ухьурчагу, Чанкурал дакIнин аьрщи ххирасса духьунссия, язи бувгьуну бия хъу-лухччинучIан гъансса пиша.

Агрономнал кIулшиву ларсун цаппара шинну дурну дур Хивуллал райондалий хъунама агрономну зий, кьуния кIира шин дурну дур Хъусращиял шяраваллил колхозрал хъунама агрономну зий. Уссия Ккуллал райондалул хъунама агрономнугу.
Ванал щалва кулпатралва агьамсса кIану бувгьуссар шяраваллил ва райондалул магьирлугъраву. Кулпат Шагьсалан зий бивкIссар шяраваллил магьирлугърал къатраву, мукьвагу душ яла хьхьичIунсса гьурттушинна дуллай бивкIссар школалул художествалул самодеятельностьрал давриву. Хъунмур душ Зарият зий бур Дагъусттаннал опералул театрдануву, чIанма-чIивимур Зульфият – Хъусращиял магьирлугърал къатраву.

ДакIния батIул бан къашай­сса музыкалул ярагъ Чанкурал тийнмай бивхьуссар, дахIалай чинсса арс Шамил оьсса чувнал ккуллалул увтун махъ. Цала канил къабугьарчагу, чIираямур къаливкссар ванал мандолина ва каманча, увкIсса хъамаличунал ччинал ликкан баншиврул.
ХIакьину Хъусрахь ялапар хъанахъиминнал дянив ца Чанкура унуккар шяраваллил тарих кIулминнава ва буручлачиминнава увагу ливчIсса. Ванал цала ужагърай тIивтIуну бур зунттал багьу-бизулуву буттахъал кьариртмур ядуллалисса чIиви-кьивисса музей.

Хъамалу бувкIминнахь бусай шяраваллил тарихрая, уртту-тIутIая, буккай цала шеърирду.
Цува махъаллил хъанай ивкIхьурчагу, махъсса шиннардий тачIав бакъачIин хъинну чIявусса агьлугу бавтIун, лайкьсса даражалий хьунни шяраваллил магьирлугърал къатлул зузалтрал хIадур бувсса Чанкура КьурбанмахIаммадовлул юбилейран хас бувсса мажлис.

– Ккуллал райондалул шяраваллил хозяйство хьхьичIуннай дан бивхьусса захIматгу, магьирлугърал оьрмулуву бувгьусса кIанугу хIисав бувну, Чанкура КьурбанмахIаммадовлул юбилейрал чIарах буккан цукунчIав къабучIиссия жунма. Гьай-гьай, я чIумуща, я жущара рахIат дан къашайссар, циксса шинну гьарчагу яла къалагайссар вайннал кулпатрал къюву. Амма, мура чIумал, хIакьину жучIара дур жула хъуначунахь, ванал цала бусса оьрмулий шяраваллил ва райондалул цIаний був­сса дакI тIайласса захIматрахлу барчаллагь учинсса, ванал творчествалучIан кIура баенсса, ванал шеърирду дакIнийн бичинсса сант, – увкунни ва даврил сиптачину ва сакиншинначину хьусса, Хъусращиял халкьуннал театрданул хъунама Марсель Сулаймановлул.
Ккуллал райондалул бакI­чи Шамил Рамазанов­лул цIания Чанкура Кьурбан­махIаммадовлун ХIур­мат­рал грамотагу дуллуну, барча увунни ванал хъиривчу Анатолий Давдиевлул.
Юбилейрай хъуннасса гьурттушинна дурунни Ккуллал райондалул магьирлугърал къатрал зузалтрал: Вихьуллал къавтIаврил ансамбльданул, ДР-лул лайкь хьусса артистка РайхIанат ХIажиевал, ПатIимат Каптаровал ва цайминнал.

Чанкура Кьурбанма­хIаммадов барча уллалисса ихтилат бувунни райондалул Магьирлугърал управлениялул каялувчи Марина Ибрагьимовал.
Бусравсса шяравучу барча ан бувкIун бия шагьрулия балайчи Нукьижат ХIурбаева.
Яла хъунмур гьурттушинна тIурча, ва мажлисрай дурунни гьунардал итххявхсса КьурбанмахIаммадовхъал кулпатрал цала. Музыкантътуращал дачIу ришлай ия Чанкурал душнил арс Шамил, балайрду увкунни душварал Зариятлул, Зульфиятлул, ванил душварал Юлианал ва Шагьсаланнул.
Махъсса шин ва дачIиннуй, пандемиялуцIун дархIусса къадагъартту сававну, я Лакрал театр къабувкIун, я шяраваллил клубраву цайми мероприятияртту къадурну, мякь бувксса шяраваллил жяматран унгу-унгусса байран хьунни. ДакI аьчух­сса Хъусращиял агьлу цивппагу бия хIурмат лавайсса хъуначунал савлугърал мажлисрал гур дан хIарачат буллай, балай тIинацIун къавтIий.