ЦIакь хьусса аьдатрайн бувну, вай ларгсса бигьалагай кьинирдайгу МахIачкъала шагьрулул хъунмур майданнив хьунни «Бигьалагай кьинилул байран». ДакIнийн бутан, ва хъанахъиссар Дагъусттан Республикалул Культуралул министерствалул, Республикалул Халкьуннал творчествалул къатлул муниципал сакиншиннардал гьурттушиврийну щаллу дуллалисса проект.
«Бигьалагай кьинилул байрандалул» лагрулий шайссар халкьуннал художествалул творчествалул «Дагъусттаннал щаращив» фестиваль. Ванил лагрулий хьунни мастер-классру, выставкартту-ярмаркартту, Дагъусттаннал Жамаллул цIанийсса Художествалул училищалул студентъталгу гьурттусса пленэр.
Ва ххуллухсса байрандалий гьуртту хьунни Лакрал ва Гергебиллал районнаясса творчествалул коллективру ва таксса балайчитал. Цалва лагма лавгсса дагъусттанлувтурахь ва республикалийн бувкIсса туристътурахь Гъумучатусса заргал Давуд Эфендиевлул бувсуна чIиллу ва ххаржант даврия.
«Бигьалагай кьинилул байрандалул» лагрулий мукунна хъанахъиссар фольклорданул коллективирттал «Наследие» цIанилусса фестиваль, цувгу хас дурсса ДАССР-данул халкьуннал артист Жамалуттин Муслимовлул аьпалун. 1909-ку шинал ЧукIуннал шяраву увсса цIа дурксса къавтIалал кьабивтун бур цаятува авадансса ва хъинсса аьпа: цимирагу ансамбль, къавтIаврил постановкартту, цала харж-хуржирацIух – къавтIалтрансса костюмру.
«Бигьалагай кьинилул байран» фестивальданий мукунна хьунни ахъвазандалул бакIлахъия датIайсса куц ккаккан буллалисса «Гергебиллайсса ахъвазандалул дара» тIисса цIанилусса аьдатрал байрангу. Ци билаятиртталнияргу, Дагъусттаннал, Дагъусттаннайгу Гергебиллал цIа дур ахъвазандалуха зузиминнал сияхIрал хьхьичIххуттай, ва ахъулсса ххяххан даврил никирая никирайн диян дуллалисса аьдатругу жучIара аваданни, чувнияргу. Дагъусттаннай, Гергебиллай, Ахъвазандалул байрангу хьхьичIра-хьхьичI дурну диркIссар 2015-ку шинал.
