Махъва-махъсса гюнгутIи ЦIуссаккуллал школалий

Махъва-махъсса гюнгутIи ЦIуссаккуллал школалий

Гьар мудан кунна, яргсса, дакIний личIансса хьунни махъва-махъсса гюнгутIул байран АхIмад-Хан Султаннул цIанийсса ЦIуссаккуллал 2-мур школалий.

ЦIуминалийсса ЦIуссаккуллал школалул кIилчинмур корпус байрандалун хасну чIюлу бувну бия. КIюрххила хIаятраву бавтIун бия чIюлуну лархсса дуклаки оьрчIру, учительтал, нину-ппу. Байрандалий гьуртту хьунни щалагу учительтурал коллектив, 300-нния ливчусса дуклаки оьрчIру ва 80-нния ливчусса нину-ппу.

Байрандалул дайдихьу дунни, цала классрал каялувчи ПатIимат Батталовнащал, выпускниктал хIаятрал лагма бувккун. Хъирив вай барча буллалисса ихтилат бунни ЦIуссалакрал райондалул КIулшивуртту дулаврил управлениялул хъунаманал хъиривчу Ирина Мажидовал.

Школа къуртал буллалиминнахь ххуллухъингу увкуну, школалул ва жяматийсса оьрмулуву хьхьичIунну бивкIсса выпускниктуран ХIурматрал грамотартту дуллунни школалул директор Татьяна Айгуновал.

Выпускниктуран хас дурну ххаллилсса къавтIавуртту ккаккан дунни цIудуккан дурсса «Щаращи» ансамбльданул. Цинявннан асар хьунни цалчинмур классрал дуклаки оьрчIал ккаккан дурсса «КIяла тIутIул авлахъ» тIисса къавтIаву. Классрал каялувчинахь, нитти-буттахь барчаллагь тIисса бюххансса ихтилатру бунни выпускниктуралгу.
Школалул администрациялул барчаллагь увкунни школалул оьрмулуву чялишсса гьурттушинна дуллай бивкIсса нитти-буттахь ва буллунни миннан барчаллагьрал чагъарду.
Махъва-махъсса гюнгутIул байран къуртал хьунни выпускниктурал увкусса, школалия личIи хъанахъисса, иттав макь дукIлакIисса балайлийну ва гьаваллавун шарду итабакьаврийну.

А. Аьбдуллаева,
И. Саидова

Читайте также: