ЦIанасса бигьа дакъасса эпидемиологиялул тагьаргу хIисавравун ларсун, Ххувшаврил байрандалул Кьинилул шадлугъру республикалий хъунмурчIин хьунни гьавалийсса тIивтIусса майданнай ва заллаву. МахIачкъалалив байрандалул концерт хьунни Т. Мурадовлул цIанийсса Дагъусттаннал ПаччахIлугърал филармониялул Гъинттулмур майданнив.

[dropcap]Б[/dropcap]усравсса хъамаллуравух ва кьини шикку бия ДР-лул ХIукуматрал Председатель АьбдулпаттахI Амирханов, мунал хъиривчу Муслим Телякавов ва цаймигу къуллугъчитал.

Концерт дайдирхьуна «Священная война» тIисса балай хорданий щаллу баврия. Ва кьини сахIналия баллай бия цимирагу никиран кIулсса, ххира хьусса, яру мукьал буцIин буллалисса «Катюша», «Эх, дороги», ва цаймигу аьрали балайрду. Мигу, мукунма ттизаманнул балайрдугу щаллу буллай бия гьарца шинал телевизион журалий шайсса «С песней к Победе» тIисса Республикалул конкурс-фестивальданий ххув хьуми.

«Лезгинка» ансамбльданул къавтIалтрал ккаккан бунни «Смуглянка» композиция. Вара концертрай вайннал цалчинма-цалчин ккаккан бунни музыкалул-хореографиялул «Ххувшаврил Кьинисса хъатIи» тIисса цIанилусса композиция. Мукунма цалва язими номерду ва кьини тамашачитуран кка­ккан бунни «Молодость Дагестана» ансамбльданул, Опералул ва балетрал театрданул артистътурал.

Аьрасатнал Федерациялул нацгвардиялул хасъсса назначениялул 102-мур личIисса бригадалул оркестрданул ва Дагъусттаннал паччахIлугърал филармониялул духовой оркестрданул щаллу дунни Василий Агапкиннул марш, цийнугу 1945-ку шинал талатаврил майданнай ххув хьуну зана бивкIун нанисса вирттал хьунабакьлай бивкIсса. Ва кьини сахIналийн мукунма бувккуна П. Чайковскийл цIанийсса ОьрчIал иску­сствалул 1-мур школалул оьрчIру, Да­гъусттаннал эстрадалул балайчитал.

Тамашачитураща цащавагу бюхълай бия балайчитуращал цанма ххирасса балайрду «Халкьуннал караокелий» тIун.
Ххувшаврил байрандалул концерт щаллу хьуна бавцIуну цинявнналагу архIал «День Победы» балай щаллу баврийну ва салютрайну.