Аьралитал барча бунни

ЦIуссалакрал райондалул бакIчи МахIаммад-ХIажи Айдиев Ххувшаврил байрандалул кьини увкIунни Дагъусттаннал ва Чачаннал дазуйсса 103 КПП-лий къуллугъ буллалисса Пермскаллал крайраясса полициялул зузалт барча бан. Мунащал бувкIун бия ЦIуссалакрал райондалийсса ОМВД-лул хъунаманал бигарду биттур буллалисса Щайх АхIмадов, ЦIуссалакрал шяраваллил администрациялул бакIчинал хъиривчунал бигарду биттур буллалисса Сулайман Рамазанов.

Аьралитал дуручлай бур шикку Дагъусттаннал ва Чачаннал дазурдал дянивсса мюхчаншиву. Вайннавух къуллугъ буллай бур оператив подразделениярттал, патрульно-постовой къуллугърал пишакартал ва участковыйтал, кинологтал, ДПС-рал инспектортал ва Росгвардиялул кьюкьри.
ЦIуссалакрал райондалул аьрщарай къуллугъ буллалисса аьралитурах мудангу ларайсса къулагъас дур. Ва ххуллухсса байрандалул кьинигу, аьдатравун багьсса куццуй, лахъа-хъун бунни 103-мур КПП-лул аьралитал.