Волейболданул турнирданул савлугъ

Гъумучиял спортзалдануву «Спорт против наркотиков» тIисса цIанилу хьунни гьарца шинал Ххувшаврил кьинилун хас дурну шайсса волейболданул турнир.

Аьдатравун дагьсса турнирданий гьашину гьуртту хьунни мукьра команда: Гъумучиял, ЧIурттащиял, КIундиннал шяраваллал ва райондалул цIу лещан дай идаралул.
Турнир тIитIлай, Райондалул магьирлугърал, жагьилтурал политикалул, спортрал, туризмалул ва библиотекалул системалул центрданул каялувчинал хъиривчу Малик ХIусмановлул барча дурна турнирданий гьур­тту хъанахъиминнахь Ххувшаврил байран, чIа увкуна бяст-ччаллий тIайлабацIу.

Цалчинмур кIану бувгьунни КIундиннал командалул. Ши­ккува кIицI бан, КIундиннал команда ва базилухгу дуркIун дия Саратов шагьрулия. Командалул капитан Шамил ЦIаххаев гьар шинал учIайссар тиха цала дустурал командагу дартIун, КIундиннал шяраваллихлу ду­ккан ва гьар базилух бугьайссар хьхьичIунсса кIану.
Командалуву буклакисса ­оьрус миллатрал гьалмахтурал кIицI лагай Ххувшаврил кьинилун хас дурсса мероприятиярттал ларайсса сакиншинна, яла-ялагу вайннал кIицI дай Парад даврил даража лахъсса кIанттай бушиву.

КIилчинмур кIану бувгьунни ЧIурттащиял шяраваллил командалул, шамилчинмур кIану – Гъумучиял шяраваллил командалул.
Турнирданул «Язима игрокнан» лайкь унни Петр Писаренко, КIундиннал командалухлу уклакисса Саратов шагьрулиясса хъамаличу. «Тамашачитурал чулухасса бахшиш» дуллунни ЧIурттащиял командалувасса Руслан МахIаммадовлун.

«Ххувшаврийнсса хъит учаврихлу» бахшиш ларсунни Гъумучиял командалувасса МахIаммадТIагьировлул.
Ххув хьуминнан ва хьхьи­чIунсса кIанттурду бувгьуминнан райондалул администрациялул бакIчи Юсуп МахIаммадовлул буллунни дипломру ва арцуйнусса бахшишру.

Турнир къуртал хьуну махъ Юсуп МахIаммадовлул дипломру ва бахшишру дуллуна гьашину Республикалул ва щалагу Аьрасатнал Чемпионатирттай ххув хьусса ва хьхьичIунсса кIанттурду бувгьусса жагьилтуран.

Цавух бур: кадишаврил бяст-ччаллий Аьрасатнал чемпион хьусса Зураб ХIажиев, дунияллул халкьуннал классрал мастер спорта (Хъунайннал шяраватусса); Булгани ТIагьиров, чIаважагьилтурал боксрал Да­гъусттаннал чемпион, спортрал мастершиврийнсса кандидат (ГьунчIукьатIрал шяраватусса); Юсуп Габиев, кикбоксинграл Аьрасатнал чемпион, спортрал мастершиврийнсса кандидат (Гъумучиял шяраватусса).