«Детский спорт» тIисса «Единая Россия» партиялул проектрал лагрулий Гъумук хьунни дуклаки оьрчIал дянивсса волейболданул первенство.
[dropcap]М[/dropcap]унил сакиншинначину увккунни ва партиялул вакил, райондалул магьирлугърал, жагьилтурал политикалул, спортрал, туризмалул ва централизованныйсса библиотекалул системалул центрданул хъунаманал хъиривчу Малик ХIусманов.
[dropcap]М[/dropcap]уний гьуртту хьунни ххюра команда, вайннува шанна дия Гъумучиял школалул ва ца-ца ЧIурттащиял ва Щардал школарттал – циняв ххюцIала дуклаки оьрчI.
Малик ХIусмановлул, гьуртту хъанахъиминнан тIайлабацIугу чIа увкуну, кIицI лавгунни ва бяст-ччаллил агьаммур мурад хъанахъишиву жагьилтал спортрахун машхул баву.
«Спортрал тIуркIурдал хъун хъанахъисса ник тIайласса ххуллийн дуцин, миннан жяматраву цанмасса кIану лякъин кабакьу буллалиссар, агьали цачIун буллалиссар», – увкунни ванал. Бяст-ччаллий ххув хьуминнан ва хьхьичIунсса кIанттурду бувгьуминнан буллунни «Единая Россия» партиялул цIаниясса дипломру ва ттупру.
