Чернобыллай бивкIминнансса къатлул сертификат
Аьрасатнал агьали къатрал дузал баврил цIаний зузисса Федерал программалул лагрулий Лакрал райондалул бакIчи Юсуп МахIаммадовлул паччахIлугърал къатлул сертификат дуллунни Чернобыллал АЭС-рай хьусса авариялул биян бувсса зараллу бухлаган буллай ивкIсса ЧIарттал шяраватусса МахIаммад ХIасановлун.
Чернобыллал оьзру жунма хьуссар мюхчаншиву дуруччаврил ялув жаваблувшинна ххишала дансса дарсну. Та оьзрулия махъ хьусса ишру бухлаган бавриву гьуртту хьуну ур жула райондалиясса МахIаммад ХIасановгу. Му бурж биттур баврихлу хIакьину паччахIлугърал дуллунни ванахьхьун оьрмулул шартIру къулай дансса каши. «ДакIнийхтуну барчаллагь тIий ура МахIаммадлухь цала бурж лажин кIялану биттур баврихлу. Вила цIуллу-сагъшиврун хъуннасса нигьачIаву духьурчагу, ина гьуртту хьуну ура та нигьачIисса авариялул биян бувсса зарал бухлаган бавриву,» – кунни Юсуп МахIаммадовлул.
МахIаммад ХIасановлулгу барчаллагь увкунни райондалул каялувчитурахь цахра дурсса аякьалухлу.
ТIивтIунни «Аьпалул вахта»
Гъумук тIивтIунни Буттал кIанттул цIанийсса Хъунмасса дяъвилий Ххувшаву ларсун 76 шин там шаврин хас бувсса «Аьпалул Вахта».
Муний гьуртту хьунни райондалул бакIчи Юсуп МахIаммадов, Лакрал ва Ккуллал районнал аьрали комиссар ХIасан Масуев, райондалул идарарттал каялувчитал, учительтал, чIавааьралитал, дуклаки оьрчIру. Райондалул бакIчинал ва аьрали комиссарнал тIутIал шалка бивхьунни дяъвилия зана къавхьуминнал гьайкалдануцI.
– ТачIав хъамакъаритантIиссар жунна бивкIулийн лажинну авцIусса саллатIнал ва дяъвилул къинттуллух зий ивкIсса захIматкашнал виричушиву. Жула яла къалагайсса буржри, му виричушиврул аьпа бурувччуну, хъирив нанисса никирайн тапшур баву, – увкунни райондалул бакIчинал.
ХIасан Масуевлул кIицI лавгунни «Аьпалул вахта» акциялул жунма бувчIин буллалишиву цукунсса багьлун дарцIуссарив жула билаятрал агьалинан бюхттулсса Ххувшаву ва му Ххувшаврил кьиматрал агьамшиву хIакьину цукунсса дуссарив.
– Жува икрамрай буссару ватан душманная мурахас дурсса талаталтрайн, Ххувшаврихлу, аьрщарай дакьаву дуруччаврихлу, чаннасса бучIантIимунихлу, – увкунни ванал.
Гъумучиял школалул дуклаки оьрчIал дурккунни дяъвилул темалун хас дурсса назмурду.
Ххувшаврил кьинилун хас дурсса мероприятияртту райондалий лахъи лагантIий дур майрал 9-ннийнин.
Барча бунни «Анаварсса кумаграл» зузалт
2020 шинал Аьрасатнаву байбивхьунни кIицI лаглай «Анаварсса кумаграл» зузалал кьини. Му кьини апрель зурул 28-нний дан ккаккан дурну дур, цанчирча гьамин ва кьини 1898 шинал Москавлив тIивтIуну бур «Анаварсса кумаграл» цалчинсса станция.
Ларгсса шинал коронавирусрал пандемиялул тагьардануву хъиннува кIул хьунни «Анаварсса кумаграл» зузалтрал даврил кьимат.
Ва кьини щала Аьрасатнаву хьунни инжитсса инсаннан цалчин кумаг бан бучIайсса кIяла хялатирттавусса пишакартал барча буллалисса шадлугъру.
Юсуп МахIаммадов лавгунни райондалул азарханалийн «Анаварсса кумаграл» зузалтрахь пишакаршиврул байран барча дан.
Райондалий коронавирусрал инфекция ппив хьун къаритан бувсса захIматрахлу, пандемиялул тагьардануву агьалинал цIуллушиву дуруччин бувсса захIматрахлу гьарца зузалан буллунни Барчаллагьрал чагъарду.
