[dropcap]М[/dropcap]ай зурул 8-нний МахIачкъалаллал зума-къирагърай цIуну буллалисса РувхIанийсса центрданийн бавтIун бия лакрал агьали зумаритаврил шадлугърайн – 8 азаруннийн бивсса инсантал.
Ва хъанай дия ц1уну буллалисса мизитраву лакрал цалчинсса ифтар. Ваниха зузиминнал биялсса захIматгу бивхьуну бия лайкьсса даражалийсса даву дуван.
[dropcap]М[/dropcap]ажлис байбивхьуна Мубараксса Кьурандалул аятирттайну. Караматсса ч1унил заллу, азан ххуйну буккаврил республикалул конкурсрай к1илчинсса к1ану бувгьусса, ИстIамлив хIапизтурал школалий дуклакисса, МухIаммад-Наби Буттаев ия аятру ккалаккимагу. Гьай-гьай, ифтар бюхттулсса Ххувшаврил байрандалул хьхьичI кьини духьувкун, дакIнийн бивчуна дяъвилул майданная зана къавхьусса виртталгу, барча бувна ветеранталгу, агьалигу.
[dropcap]М[/dropcap]ажлис усттарну бачин бувну ия Азим Давидов. Дагъусттаннай дин цIакьгу, хьхьичIуннайгу шавриву лакрал аьлимтурал-динчитурал, щайхтурал хъунмасса бутIа бивхьушиврия, рувхIанийсса ирс-ххазина буруччин, исламрал ххуллу-ххуттай цIакьну бацIан, Лакку кIанугу, лакку мазгу ябуван аьркиншиврия бия ихтилатру.
Агьали барча буллалисса ихтилатру бувна Лакрал райондалул бакIчи Юсуп МахIаммадовлул, муфтинал хъиривчу МухIаммад Майрановлул, Муфтиятрал вакил Шамил БахIандаьлиевлул, аьлимчу-динчи МухIаммадрасул Сааьдуевлул, Ц1уссалакрал Имамтурал советрал председатель Мансур Хаваевлул, Лакрал жагьилтурал ккурандалул хъунама МухIаммадманнар Бариевлул, ДГИ-лул преподаватель, философиялул элмурдал доктор, профессор Асият Буттаевал, Аьрасатнал культуралул лайкь хьусса зузала, жяматийсса ишккакку Качар Х1усайнаевал, Мариян Илиясовал ц1анийсса «Дараччи» фондрал хъунмур Гульшан Хасаевал, Лакрал радиолул хъунмур редактор Тамара Закарьяевал. Лях-карах тIий бия нашидру «Хайрат» ва «Нашидуль Ислам» группарду, Дагъусттаннал халкьуннал артист Ринат Каримов.
[dropcap]М[/dropcap]ажлисрал программа авадансса дия. Мюрщи оьрчIансса викторина дия. Мукьра шинавусса Ибрагьимова Наргизлул циняв хIайран буванну назму дурккуна. «Ислам в Лакии» порталданул администратор Арсланаьли Сулаймановлул хIадур дурну дия дунияллул гьарцагу мурцIния лакрал агьали барча буллалисса видеоролик. МухIаммад-Набинал азан учайхту, бавчIуна тIаннул цIарай бувсса нахIува-нахIусса пулав, ахъулсса ва хIачIанмур. Тиккува маркIачIан чакругу бувну, дуаьрттугу дурккуну, кувннаяту кув щакъаливхнува, ппив хьуна агьали, ифтардануха зий бивкIминнайнгу барчаллагьрай. Магъи дишин дурасса мизитрал ялувсса цIан ссав чанна дурсса салютирттайгу агьалинал тамаша бувна. Ккавкчув кIулчуври учару жува. Мажлисрал хIакъираву цала пикри бусан махъ – гьуртту хьуминнахьри.
Качар Х1усайнаева, Аьрасатнал культуралул лайкь хьусса зузала:
– Оьрму лавгсса бунугу, диндалул иширттахух лавгсса нава бакъанугу, Лакрал ифтар баян байхту, ххаришиврул хъаттирдай бувкIра. Цан чирча, жула миллат аьмну батIлатIисса иширавух гъирарай хIала буххан ччан бивкIун тIий? Тания мукьах гьантри лавгнугу, дакI хIакьинугу чаннасса, тIааьнсса асардал дурцIуну дур. Ца тирхханну дия дакIний, та мухлукьрал лагмава лакку мазрайсса ихтилатру баллалийни. Ва ппурттух циняв ниттил мазрай гъалгъа тIун гъирарай бия. МахIаттал хьура дурсса даврил масштабрал бюхттулшиврий, гьарта-гьарзашиврий. Бивхьуцири захIмат. Ляркъуцири халкьуннал дакIру тирх учин дансса увинтру. Лажин ляхълай бур къаучиншиврул, цIарду кIицI къалаганна, амма, я Аллагь, зул, сакиншинначитурал, ка кIидархIунал оьрмурдай барачат бишиннав. Мажлис къуртал хьуну мукьахгума ппив хъанай бакъая. Шиннардий къаккаккайсса гъанми, кIулми, дусми инсантуращал хьунабакьлай, хъямала багьлай, ххаришиву кIидачIлай бия. Иттав макь дукIлай дия, пахру багьлай бия. Лак кувннах кув мякь бувккун бушиву тасттикь хъанай бия. Цал ттигу барчаллагь ва байран укун бюхттулсса даражалий сакин дурсса инсантурайн. Зул захIмат Заннан кьамулну лякъиннав.
Лакрал байран
барча дуллалисса кьатIаллил билаятирттаятусса
ссалам-ссайгъат
Лакрал ифтарданийн бавтIцириннан ляличIиссава ссалам-ссайгъатну хьунни кьатIаллил билаятирттайсса лакрал бавтIцири барча буллалисса ролик. Ва ролик социал сетирдайгу машгьурну дур, вания буслай-гъалгъа тIий бур. Цинявннал суратру дулун хъанай бакъахьувкун, кIицI лаганну гьуртту хьуминнал цIарду ва билаятру:
Мадина ва Каддур Шакер (Франция); Мадина Шахруева (Австрия); Диана Штанчаева (Тунис); Сагъират Ссунгъурова (ОАЭ, Дубай); Зарина Маммаева (Сербия, Белград); АхIмад АхIмадов (Турция, Стамбул); Сиражуттин Къапиев ( Швеция, Стокгольм); Мурад Ягизаров (Шри-Ланка); Фатин Дагчинар (Турция, Анкара); Зиза Юнусова (Швеция); Нуриян Наврузова (Эстония, Таллин); Мааьзат Чаринова (Болгария); Марина Баканова (Пакистан); ХIажи СалихIов (Германия, Кёльн); Аделя Муслимова (США, Чикаго); Карина (ДНР, Донецк); Ягъизаровхъал кулпат (Грузия); Ярагъи Кьурбанов (Тюмень); Калеб Шмидт (Сургут); ХIажибутта ХIусайнов (МахIачкъала).
Ролик ххал дувара Фейсбукрай ва Инстаграмрай «Илчилул» аккаунтирттайгу.
Шяпи Оьмаров, Ярославрал областьрайсса Дагъусттаннал диаспоралул хъунама:
– Ттул дак1 ххари хъанай дия, ч1явусса лак бавтIун ххал шайхту. Республикалул кьатIату бувкIссагу бия. КьатIаллил билаятирттай яхъанахъисса лакрал Зумаритавал байран барча дуллалисса видеороликгу ххуйсса бахшишну хьунни бавтIцириннан. Хаснува лакку мазрайсса барча бавуртту. Лакрал халкь щаллагу дунияллийх кIама бивщусса, ппив хьусса миллат бур, тарихийсса миналий яхъанахъисса лакращалсса дахIаврил ламуну, ссалам-ссайгъатну хьунни. Ва давугу жулла дянивсса дахIаву цIакь дувансса даву хьунни.
Мариян Кьаландарова, Москавливсса Дагъусттаннал диаспоралул вакил:
– Цалчинма-цалчин, ч1ярусса шинну Новосибирскалий, гъурбатрай, дурсса ттун личIинува гъира бикIай лакрал дуллалисса ва лак хIаласса давурттавух гьуртту хьун. Махъра-махъ дурсса переписьрайн бувну, Аьрасатнал билаятрай лакрал аьдад дур 180 азара инсан. Жунма аьркинну бур жува бухкъалаганшиврул цачIун хьун, тарихийсса минагу, мазгу ххассал буван. На гьуртту хьура Москавливсса лакралмур ифтарданийгу, Москавливсса Дагъусттанналмур ифтарданийгу. Тиккугу ихтилатру бавкьуну, динну ва миллатру личIи къабуллай, къуццу т1ун аьркиншиврия, жула миллатрал ялун пашмансса кьадар буч1ан къабитан аьркиншивриясса бия. Вайксса ч1явусса агьали бавтIун ккаккайхту, ттуву жулва миллат къабухлаганссархха тIисса пикригума цIакь хьунни. Ттун хIакьину ккарккунни къабухлагаврил ххуллий х1арачат буллалисса патриотътурал дурсса даву. Ва мажлисгу лякъиннав дакIурдиву иман цIакь дувавричIансса ва миллат уттава буккавричIансса сахаватсса хъитну.
Самрат Горчханова, телевидениялул даврил ветеран:
– БавтIцириннал симанну чанна лархъун дия. Чунмай бургарчагу, нур лархъсса симанну, тяхъасса ссаламру бия. Исламрал щалвагу миллат цачIун бувну бия. Кувннан кув ххал шаврия ххарину, рязину бия. Тайксса чIявусса агьлу щябитан, дуканмунил ва хIачIанмунил дузал буван бигьа бакъассар, гьарзат низамрай ва сантирай дуллай бия. Шиккува кIицI лаганна, Лакрал райондалул бакIчи Юсуп МахIаммадовлул царагу ккалли дансса мероприятие лях гьан къаритайшиву, барчаллагьри цан. Цайми хъуни къуллугъчитал бивкIсса-къабивкIсса къакIулли, сахIналийн му акъа къаувккунни. На тамансса шинну Дагъусттаннал телевидениялий исламрал передачарттал режиссерну зий дурссар, ттун кIулли диндалуцIун дархIусса давуртту дуван личIинува захIмат-жапа шайшиву. Лакрал лажин к1яласса ххаллилсса даву дунни. Жулва оьрчIру, наслу яхIиравун бутансса даву дунни. ЯлунчIингу зумарду дугьлангу, цачIу итадакьлангу ц1уллушиву дулуннав! Ва ифтарданул барачат щалвагу миллатрайн ликканнав!
