Каманча канихьну кьамул бунни Саэдлул хъамал

Щалагу билаятрай Ххувшаврил байрандалул гьантрай мажлисирттайну, концертирттайну, цанна-цанна хас дурсса парадирттайну, бахшиширттайну ва шадлугърал даражалийсса мероприятиярттайну барча бунни ва лахъа-хъун бунни Хъун дяъвилул ветерантал.

ХIакьину 99 шинавун ивсса Хъусращиял шяравасса ветеран ХIусайнахъал Саэдлун хасну ва ялапар хъанахъисса къатрал хьхьичIсса хIаятраву аьрали оркестрданул дунни ххаллил­сса Парад.


[dropcap]В[/dropcap]етеран барча ан бувкIунни шагьрулул администрациялул мэр Салман Дадаев бакIчисса делегация, Дагъусттаннал жагьилтурал гвардиялул активистътал ва чIявусса цаймигу.

Цала куццуй каманчагу бивщуну, аьрали балайрду тIий кьамул бунни ванал шагьрулул администрациялул чулухасса делегация.
Саэдлул оьрмулувусса яла агьаммур байран барча дан ваначIан увкIунни Хъусращиял шяраваллил бакIчи Аьлларазуев Арсен.

Арсеннул, ветеран барча уллай, чIа увкунни ванан цIакьсса цIуллушиву ва дуллунни шяраваллил администрациялул чулухасса арцуйнусса бахшиш.
Цува барча ан увкIсса цаягу хъамаличув ургъил къабувну къаивтунни Саэдлул, цала зумувну каманчагу тIуркIутIи бувну, асар хьунсса аслийсса балайрду увкуну.

Дяъвилул сасан увсса, янсаврал кьанкьгу, ккуллардал зевгу цирив кIулсса , яхIгу-чувшивугу ххишаласса Саэд таза-тяхъа буккан буллай кьамул буллай ия хъамал.
Цала буттал шярава Арсен Аьлларазуевлущал бувкIсса хъамаллурангу бивщунни Саэдлул каманча, увкунни балайрду.

[dropcap]Ш[/dropcap]иккува кIицI лаган, уттигъанну шяраваллил администрациялул бакIчину ивтсса Арсеннул Ххувшаврил байрандалущал барча бунни Хъун дяъвилул ветераннал щащар Шахруева Муслимат ва Венгриянал дяъвилул иширттал ветеран ЦIимпаев Муртазааьли.