МяйцIаллий кIилчинсса гюнгутIи

МяйцIаллий кIилчинсса гюнгутIи

Гьашину Лакрал райондалий школа къуртал бунни 39 оьрчIал, дурусну ларгсса шиналуксса.

Лакрал райондалул школарттай бивщунни махъва-махъсса гюнгутIи. Итникьини райондалул бакIчи Юсуп МахIаммадов лавгунни Гъумучиял школа къуртал буллалими барча бан, цIусса оьрмулул ххуллийн буклакиминнахь ххуллухъин учин.

Ва кьини школалущал батIул хъанахъими барча бан Гъумучиял спортзалданувун бавтIун бия, миннал учительтал ва нину-ппу бакъасса, чIявусса агьлу.
Юсуп МахIаммадовлул кIицI лавгунни школа къуртал буллалиминнал хьхьичI тIитIлай бушиву цIу-цIусса ххуллурду, чIа увкунни гьарцаннан жяматраву цала кIану лякъинсса тIайлабацIу.
– Сивсуну ва дакI дарцIуну буккияра зува язи бувгьусса ххуллийн, чялишну ялун личин буллалияра зула гьунарду.

ХIарачат бувара зула бюхъу-бажар ишла бан, так ца зунма бакъасса, щала райондалунгу мюнпатну. ТачIав хъама мабитару райондалул ялун бучIантIимур хъунмурчIин зула кIунттихь бушиву.
Ттул умуд бур зуяту райондалун пахрулунсса инсантал буккантIишиврийн. На дакIнийхтуну чIа тIий ура зун тIайлабацIу ЕГЭ дулавриву ва гихуннайсса дуккавриву, – увкунни райондалул бакIчинал.

Школа къуртал буллалиминнан тIайлабацIу чIа увкунни Лакрал райондалул КIулшиву дулаврил управлениялул цIусса каялувчи Тимур МахIаммадовлул, Гъумучиял школалул цIусса директор Соня МухIуевал, дуклаки оьрчIал нитти-буттахъал, учительтурал.
Дуккавриву, спортраву ва жяматийсса иширттаву хьхьичIунсса оьрчIан дуллунни хIурматрал грамотартту.
Шеърирдайну ва балайрдайну хъуними уссурваврахь ххуллухъин увкунни цалчинмур класс къуртал буллалиминнал ва Гъумучиял ОьрчIал магьирлугърал школалий тарбия хъанахъиминнал.

Читайте также: