[dropcap]М[/dropcap]ай зурул 18-мур кьини ккаккан дурну дур Дунияллул халкьуннал дянивсса музейрдал кьинину. Ккуллал райондалул тарихрал ва улча лахьхьаврил музейраву хьунни му кьинилун ва Ххувшаврил кьинилун хас дурсса шадлугъ.

Музейравун бувкIун бия Ваччиял школалул 4-мур класс къуртал буллалисса оьрчIру. Вай цивппагу бия аьрали яннардаву ва ттупангирттащал. Бия вайннащал ва шадлугърал сиптачину хьусса классрал каялувчи Атта Рамазанова ва библиотекалул каялувчи Аьйша Исякьовагу. ОьрчIру музейрал заллавух бувккуна. Музейравусса экспонатирттая буслай бия гид-экскурсовод Шюъбанат АхIмадова ва музейрал художник Сиражуттин Кьурбанов.

Музейрал директор ТIагьир Абакаровлул увкуна:
– Вай иширттавугу яла агьаммурну хъанахъиссар буттахъал оьрмулуву бивкIмур ирсирай ябувну бушиву музейрдаву. Учительтуращал бакъа, бучIаван аьркинссару зувалугу музейравун. Шикку яхьуну буссар жула миллатрал, райондалул, шяраваллал тарихрая бусласисса чагъарду, суратру. ХIакьинусса жула хьунабакьавугу хас дурссар Хъун дяъвилий жула буттахъал Ххувшаву ларсун 76 шин бартлагаврин.

Вайнна шикку жула дяъвилул ва захIматрал вирттаврал суратру, дянивгу — 1-мур ЦIувкIуллал шяравасса аьралий лехху, душманнал самолетру дичу, АхIмад-Хан Султан. Жу, хъуниминнал хьуннав, зу кунма ялун нанисса никирал хьуннав, вайннаха лащан, вайнная эбрат ласлан аьркинссару, – куна ванал.
Атта Рамазановал кумаграйну оьрчIал ккаккан дуруна театрал зумунусса суратру. Дурккуна декламацияртту, шеърирду, увкуна бюхлахисса балайрду.