Аьдатравун дагьсса куццуй, Ххувшаврил Парад дайссар Ккурккуллал шяраву 8-мур майрал кьини. Гьашинусса Ххувшаврил байрандалул мажлис пашмансса асарду ялтту буклакисса бия. Акъая ва кьини жущал Ххувшаврил парадрал муданасса сакиншинначи ва «БивкIу бакъасса полк» акциялул сиптачи Даниял Магьдиев. Амма ванал дуллай ивкIсса ххаллилсса даву дяличIан къаритан шяравун бувкIун бия ванал оьрчIру, гъан-маччами, дустал, цинявппагу ва ххирами. Байрангу ларгунни лайкьсса даражалий.

КIюрххила шяравух бюхттулну лехлай бия дяъвилул балайрду. Гьар мудан кунна, байран дайдирхьуна «БивкIу бакъасса полк» акциялийну. Ттаттахъал суратругу, миннан хас бувсса альбомру ва миннал аьрали наградарттугу ларсун дуклаки оьрчIру шяраваллил майданналул лагма бувккунни.

[dropcap]Я[/dropcap]ла дирхьунни тIутIив дяъвилий ливтIуминнансса гьайкалдануцI. Ккурккуллал шярава дяъвилийн лавгун ур 128 инсан, миннава 57 зана къавхьуну ур. Дуклаки оьрчIал бюхттулну дурккунни Ватан душманная дуручлай жанну дуллусса вирттаврал цIарду.

Дурккунни дяъвилиясса назмурду. ЛивтIуминнал аьпалун баян бунни минутрайсса пахъ багьаву. Хъирив учительтал, дуклаки оьрчIру, хъамал бавтIунни школалул Аьрали музейрачIан. Ва кьини шикку тIитIлай бия музейрал гьану бивзма, ванил каялувчи Даниял Магьдиевлул аьпа абад буллалисса ула. Ула тIитIлай, Даниял дакIнийн утлатисса ихтилат бунни ванал хъинсса дус, Лакрал райондалул коммунистурал хъунама МахIаммад Хъунбуттаевлул.

[dropcap]Ш[/dropcap]яраваллил библиотекалул хъунмур Сияли Аьбдуллаевал ва Культуралул къатлул зузала Аймисай Аьбдуллаевал сакиншиннарай музейраву дирхьунни Къучагъшиврул дарс. Дуклаки оьрчIащал ихтилат бунни Авгъан дяъвилул ветеран, «За боевые заслуги», «За отвагу» медаллан ва цаймигу аьрали наградарттан лайкь хьусса Сапижуллагь Аьбдуллаевлул.
Хъирив байбивхьунни спортрал бяст- ччал: лечаву, турникрай гьаз шаву, пут личаву ва гьаз даву.

Бяст-ччаллаву хьхьичIунсса кIанттурду бувгьуминнан Даниял Магьдиевлул сурат дусса медаллу ва дипломру буллунни ванал арснал Робертлул.