Май зурул 23-нний ЦIуссалакрал райондалий хьунни цIусса объектру тIитIлатIисса шадлугърал даражалийсса мероприятие. Шикку гьуртту хьун бувкIун бия Дагъусттаннал ХIукуматрал председательнал цалчинма хъиривчу Нюсрет Оьмаров бакIчисса делегация. Вайннавух бия ДР-лул экономикалул министр Руслан Аьлиев, ДР-лул виваллил иширттал министрнал хъиривчу Сахават Сахаватов ва мукунма цаймигу.
ХьхьичIва-хьхьичI вай бивунни Гьамиящиял шяравун. Ва кьини шикку тIитIлай бия «Цунди – Щабдух» тIисса спортрал комплекс. Гьамиящиял школалий бур спорт ххирасса, личIи-личIисса спортрал бяст-ччаллаву хьхьичIунсса кIанттурду бувгьусса оьрчIру. ОьрчIангу, учительтурангу, нитти-буттангу ххаллилсса бахшишну хьунни циняв шартIру дусса, гьарица аьркинмунил дузал бувсса, хъунмасса (534 кв. метра дусса) спортзал. Гьамиящиял шяраву спортзал бакъашиврийн бувну нину-ппу оьрчIру личIи-личIисса спортрал секциярдайн биян бан шагьрурдайн занан багьлай, азурда хъанай бия.
Спортрал комплекс бувну бур райондалул бюджетравасса ва агьалинал дартIсса арцух, 15 миллиондалия лирчусса арцун бавцIуну бур спортзал.
– Гьамиящиял шяраву вайми щархъавунияр ххишаласса каши-кьудрат дусса инсантал бакъассар. Амма вайннал, цинявппа цачIун хьуну, дунни ва ххаллилсса даву. Райондалул бюджетрава так 2 миллионни ва даврин итабавкьусса, лирчIми арцу агьалинал цалва хIарачатрацIух дартIунни. ДакIнийхтуну барчаллагь тIий ура цинявннан эбратрансса сипталущал бувксса Гьамиящиял жяматрахь. Укунсса даву дурсса жяматрал чIарав ацIаву мурадрай, райондалул ххуллурду бакьин бан ккаккан бувсса 11млн арцуя ва шяраваллин 6 млн итабакьинсса пикри буссар. Му бакъассагу, райондалул бюджетрава спортзалданун аьркинмур дузал дан 500 азарда къуруш бахшиш дантIиссар, – увкунни МахIаммад-ХIажи Айдиевлул.
Хъирив республикалиясса хъамаллурал ххал дунни Гьамиящиял школалул къатри. Ми дух хьусса, мюрщисса ва къумасса классру бусса дур. ЦIана шикку кIива сменалий дуклай ур 200 оьрчI. Сант дагьну дуна, ХIукуматрал вакилтурал хьхьичI директорнал ва учительтурал коллективрал гьаз бунни цIусса школа баврил масъалагу. Хъамаллурал къулагъасрайн лавсунни вайннал масъалартту ва махъ буллунни ми дузрайн буккан бансса кумаг бан.
Школа ххал бувну махъ, делегация бивунни шяравусса асфальтный заводрайн. ХIакьину ва заводрай бур 35 инсан зунсса кIану. Чансса дакъар шиккугу чIумуцIун дархIусса захIматшивуртту. Республикалул къуллугъчитурал махъ буллунни заводрал масъалартту щаллу бан шайсса кумаг бан.
Яла, делегациялул ххал бунни вара шяравусса 12, 5 гектар аьрщарайсса багъ. ЦIана шикку аргъирай бивну бия кьюнукьи.
Хъамаллурал хъиривсса аьрххи багьунни Ямансу шяравун. Шиккугу вайннал ххал дунни мархлуцIакул цIу дуккан дан, дакьин дан багьлагьисса школалул къатри. Нюсрет Оьмаровлул вай давурттан кабакьу бансса махъ буллунни.
Гьамиящиял ва Ямансуллал шяраваллавусса объектру ххал дурну махъ, хъамал бувкIунни ЦIуссалакрал шяравун.
Шиккугу шадлугърал даражалий тIиртIунни райондалул бакIчинал ва шяраваллил жяматрал хIарачатрайну, кутIасса чIумул мутталий цIу дуккан дурсса, 1999 шинал дяъвилул иширттаву жанну дуллусса, вирттаврансса гьайкал. Утти гьайкалданий дуссар 13-гу Аьрасатнал Виричуналсса дакъассагу, 1999 шиналсса, дяъвилул иширттаву жанну дуллусса цинявппагу ЦIуссалакрал РОВД-лул зузалтралссагу суратру.
Хъамал махIаттал бувну бия чIирисса чIумул мутталий райондалий дурсса давурттал.
Хъунмасса захIматгу, харжлугъгу бивхьуну цIу буккан бувну бия ЦIуссалакрал шяраваллил майдан. «Формирование комфортной городской среды» федерал программалул лагрулий, цIусса плитардугу даркьуну, инсантал щябикIансса скамейкартту, чирахъру бивхьуну, мурхьуру ва тIутIив дургьуну, цIу буккан бувну бия парк. Шиккува, тIивтIуну бия оьрчIру бялахъансса ххаллилсса паркгу.
Майданнивсса мажлис тIитIлай ихтилат бунни райондалул бакIчи МахIаммад-ХIажи Айдиевлул.
Ванал дуллунни хIукуматрал чулухасса личIи-личIисса наградартту вай давурттаву чялишсса гьурттушинна дурминнан. Барчаллагь увкунни хъамаллурахь. Хъирив, хъамаллурал ва райондалул агьалинал дирхьунни тIутIив цIу дуккан дурсса гьайкалдануцI.
Ва кьинисса шадлугърал мажлис къуртал хьунни райондалул Культуралул управлениялул зузалтрал ккаккан дурсса ххаллилсса концертрал программалийну.
А. Аьбдуллаева,
И. Саидова
