БартлагантIиссар зулми хияллугу

Апрель зурул 17-нний ЧIяйннал школалул учительтурал ва оьрчIал, гьарта-гьарзасса лагрулий кIицI ларгунни Космонавтикалул кьини. Шикку физикалул кабинетравун бавтIун бия 5-11-ми классирттал яла сивсуми оьрчIру ва душру. Шадлугъ дачин дурну бия школалул учитель Рамазанова Сиянат.

Гьай-гьай, лархъун дия класс­рал чIирттайн космонавтикалун хас дурсса плакатру, дянивгу дия Гагариннулмур сурат. Ттун хъинну ххуй бивзуна ва мажлис-тяхъашиву дуллали­сса физикалул кабинет. Физикалул элмулуцIун дархIуну дурхха чIяруми аьламравун леххаврил давуртту, лехханшиврул буван багьлагьисса жамирдал проектругу. Шиккура ккаккан дуллай бия аьламравун леххаврия бусласисса суратругу.

Мажлис — тяхъашиву хIасул дурну дия доскардал ялув лавхъсса шарикирттаву бивхьусса суалла­хьхьун жаваб далаврийну. Шарик п1якь учин бувну, гиву бивкIсса суал доскалучIан увкманахьхьун булайва. Гиву бия балай учин, хавар бусан, космосравун леххаврин хас бувсса суаллу. Кару гьаз дуллай, хъинну бажар буллай, гьуртту хъанай бия оьрчIру. Бия, мукунма, кару ишла къадурну кканпитI ликкан, гьивч букан багьлагьисса номердугу. Бия ца стакандалува кIиннал цала-цала стакандалувун къусух щин ххилаххисса номергу. Хьуна цаймигу хъярчий­сса номерду.

Цила ихтилатраву Сиянатлул увкуна:
– Ва Космонавтикалул кьини жула лакрангу хъинну хъунна­сса кьинину хъанахъиссар. Циван учирча, жула Муса Маннаров, кIийла аьламравун левххун, ца шин ва дачIи дурсса чув уну тIий. Инсан муданагу, бакI гьаз дурну, ссавних уруглай, цIурттал хIисав ласлай ивкIссар,– куну. ЯхI бувара, оьрчIрув, зула-зула хияллу бартбигьин ва жула Ла­кку билаят тIутIайх бичин буван. Хъинну ччан бикIарча, къашайсса затру чансса бакъа ба­къассар.

Читайте также: