Ттул тухумрал Хъун дяъви

ХIакьсса махъру хъанай бур «Хъун дяъвилул щавщи къавщусса кулпат бакъассар» тIисса махъру. Жунна мукунна дакIния дуккан ритан къабучIиссар та дяъвилул кьинирду лархъсса жула-жулами агьулданул цIардугу. Ми ирсирай тапшур дуван аьркинссар. Та дяъвилул гьарцагу къушлил цIабиркь кунпайкун дурну диркIссар. Му тикрал къахьуншиврул ялун нанисса никирахь чIун-чIумуй, вай байраннал кьинирдай бакъагу, буслан аьркинссар. Му чIумалли миннал дакIурдиву Ватандалул чулухуннайсса ччавугу, буттал аьрщи цIакьну ядансса гъирагу ххишала хъанахъисса. Утти ттун кIицI лаган ччай бур Вихьуллал шяравусса МахIатIулавхъал тухумрая дяъвилий гьуртту хьуминнал цIарду, яни ттулагу тухумрал.

МахIатIулавхъал тухумрая Хъун дяъвилийн лавгун ур ттул бу­тта МахIутIулаев Шяъбан, буттауссу ХIусайнов Чарин, кIилчинма буттауссу ХIусайнов Рашид. Дяъвилия зана хьуссар ттул бутта Шяъбан, буттауссу Чарин. Дяъвилул цIараву ливчIссар Рашид тIима буттауссу, ятинтал хьуссар ванал шама арс: МахIаммад, Сулла, ХIасан. Ттул буттарссил, Ххадижатлул, лас, Кьадиров Аьлил, зана къавхьуссар дяхвилул цIарава. Ятинну ливчIссар вайннал арс Жяъпар. Цамур буттарссу Аьйшатлул лас, Каллагу, дяъвилия зана къавхьуссар, арс ва душ ятинтал хьуссар. Шамилчинмур буттарссу ПатIимат щар хьу­ссар Хъун дяъвилия зана хьусса Ттугъайхъал тухумраясса Ттугъаев МахIаммадлун. МахIаммад буслан икIайва цува талай ивкIшиву жула Дагъусттаннаясса аьрали командир Танкаев МахIаммадлул каялувшиврулу. Ттул кулпатрал, Аьйшал, бутта, Чаринов ХIасан, увкIссар Хъун дяъвилия муша­къат хьуну. Ва цувагу чIярусса шиннардий Вихьуллал пучрал каялувчину зий ивкIссар.

Ттул ниттил, КIуруххъал тухумравасса ХIуриял, ия кIия уссу – Шяъван ва КIурух. Шяъван дяъвилул шиннардий (брон буллуну) зий ивкIссар Хъусрал-ЧIарав бухгалтерну. Яла махъ зий ивкIссар Вихьуллал колхозрал председательну. КIурух ия 1926-ку шинал увсса. Мунияту ва, дяъвилийн къагьарчагу, зий ивкIссар дяъвилун аьркинсса сурсат дуллай. КIурух цал бакIрайва дуклай ивкIссар га чIумалсса «Двигательстрой» (уттисса Каспийск шагьрулий) ФЗУ-луву. Яла, Къапкъазнавун дяъви гъан хъанан бикIайхту, ФЗУ бизан бувну бивкIссар Ураллай­сса Лувмур Тагъиллайн, ниттиуссугу лавгссар тиккун. Тикку зий ивкIссар дяъвилун аьркинсса сурсат дузал дуллай. Амма, цIуцIи хьуну, зун къахъанан икIайхту, ванал уссу Шяъван лавгун, тиха шавай увцуссар.
Дяъвилул шиннардий къин­­ттуллух ряхва зуруй зий бивкIминнан дуллай бикIайва дяъвилул гьурттучи ушиврул цIарду. Мукунсса цIа ттул ниттиуссил КIурухлул къадикIайва. Ва ишгу ттун кьюлтIнува ливчIунни.
Вай на кIицI бувминнал цIарду абадссар. Вайннал жунна тархъаншиву дуллуссар. Ва тархъаншивугу ядан яхI буван аьркинссар жува.
Барча жулла Ххувшаву!

Читайте также: