Миллатирттал мазру ябаврил ххуллурду

Миллатирттал мазру ябаврил ххуллурду

Февраль зурул 18-нний, Ниттил мазрал кьинилун хасну, Миллатирттал культуралул центрданий хьунни ккуркки стол хIисаврайсса заседание. Ва Дагъусттаннал Национал политикалул ва динийсса иширттал министерствалул сипталийну дуллалисса даву дия. Гьанумур темагу дия миллатирттал мазру ябуваву республикалул хIукуматрал национал политикалул хьхьичIунсса масъалар тIисса. Дайдихьу дуллалисса махъ лахълай, кIицI лавгсса министерствалул каялувчи Энрик Муслимовлул, статистикалул хIасиллайн бувну, дунияллий кIира нюжмардул дянив цумур-бунугу ца маз бухлаглай бушиврий чIурчIав дуруна.

– Миллатрал маз уттавану бикIантIиссар, му мазрай ца инсанагу гъалгъа тIий уссаксса. ЧIяву миллатру ва чIяву мазру бусса республика хIисаврай, Дагъусттан уникальнийсса билаятран ккаллиссар, хIакьину гьарцагу да­гъусттанчувнал буржри му аваданшиву ядуванмур буллан,– увкуна министрнал.

Аьрасатнал Халкьуннал ассамблеялул региондалулмур отделениялул хъунама Зикрулла Илиясовлул бувсуна, республикалий шаназарунниха лирчусса жяматийсса ккуранну духьурчагу, миннуву сайки царагу ккуран дакъашиву миллатирттал мазру ябавриха зузисса ва зун ччисса. Тарихрал элмурдал доктор, профессор, РАН ДФИЦ тарихрал, археологиялул ва этнографиялул институтрал вакил МахIаммадов МахIаммадханнул маслихIат бувна, циняв миллатру ва миллатирттал ихтиярду цану ккакланшиврул, «мюрщи миллатирттал мазру» тIисса калима ишла къадуллан. РАН ДНЦ-нул мазрал, литературалул ва магьирлугърал отделданул хъунама МахIаммад МахIаммадовлул, анжагъ мазру ябаврия гъалгъа къатIий, ми гьаз баврия, хьхьичIунмай баврия гъалгъа тIун чIунссар, миннуцIун паччахIлугърал статус цIакь дурну дикIан аьркинссар, делопроизводство миллатирттал мазурдий дикIан аьркинссар, мазру зузи буван аьркинссар увкуна.

Дагъусттаннал паччахIлугърал университетрал Ниттил мазру лахьхьин буллалисса центрданул директор Марина ХIасановал бувсуна цуппа каялувшиву дуллалисса центрданул ххюра шинал мутталий Дагъусттаннал мазурдийсса 23 лу итабавкьушиву, миннувугу 16 лу Миннацрал кабакьаврийну. Вава Миннацрал грант ларсъсса Марина Ибрагьимовал «Миллатирттал мазурдийсса аудиолуттирду» тIисса проектрая бувсуна. Миллатирттал мазру ябаврия, агьамшиврия ва чаранная ихтилатру бувна Да­гъусттаннал Журналистътурал союзрал председатель Аьли Камаловлул , «Литературалул Да­гъусттан» журналданул хъунама редактор Мурад АхIмадовлул, Расул ХIамзатовлул фондрал вице-президент ХIабибат Аьзизовал, педагогикалул элмурдал доктор, профессор МахIаммад Рамазановлул ва цайминнал.

Сайки шанна ссятраяр лахъи лавгсса ва мажлисрай гьуртту хьусса гьарманал ихтилатрах личIлулну вичIи дирхьусса навагу ххибувавияв, зувира шинал лажиндарай мазрал хIакъиравусса ихтилатру ца хху­ттая цамунийн гьаз хъанай ба­къар куну. ПаччахIлугърал хIарачат ссайнчIав къабуккантIиссар жулвамур хъит бакъахьурча. Миллатирттал мазурдий кказит-журналлу итабакьлай бур, радио дур, телеканаллу дур, театр бур… Амма, яла-яларив, бакъассар банмур лакрал щархъурду ххялтIа дуклай дуссаксса, Лаккуй мина дирхьумигу, кIийн лага-бучIаймигу шиная шинайн чан хъанай буссаксса. Гьарца лаккучунал цала тарихийсса буржну ккалли булланнав ниттил маз ябувавугу, лахьхьавугу. ЧантI увкуну, ичIува лакку мазрай гъалгъа тIурча, кIулсса куццуй, гъалатIнугу, къухънанугу ишла булларча, гьа, миллатрал кказитру-журналлу ккаларча, хIатта ца хха бувчIлай, ца хха къабувчIлай ккаларчагума, театрданувун занарча, хъанан­ссия жува тIутIимуницIунсса кабакьугу.

Аватар

Патимат Рамазанова

Заслуженный работник культуры РД

Читайте также: