Ваччав

КIинтнил ахир ва интнил дайдихьу жула инсантурал шадну кIицI лагай. Му чIумул яла яргмур лишаннугу хъанан дикIай барта. Утти барта хъиннура яргсса, жула тарихраву хьусса иширттая бусласи­ссагума хьуну дур. Вана гьашину Дагъусттаннал автономиялун 100 шин шаврин хас дурсса бартри дия Ваччав хьусса Интнил хьхьунил шадлугърай.

Март зурул 22-нний микку хьунни культуралул зузалтрал хIадур дурсса байран. Ва шадлугъ хьуна райондалул Культуралул къатрал хIаятраву, «Вир­ттаврал аллеялул» чIарав. Ши­кку Интнил кьини хьунадакьин цалла бартращал бувкIун бия циняв шяраваллал культуралул зузалт. Яла янилун дагьлагьисса, авурсса, хъунисса бартри дия Ваччиял, Ккуллал, Хъусращиял культуралул къатрал зузалтрахь. Мюрщисса духьурчагу, вайми шяраваллалмигу хъинну янилу дацIансса бартри дия.

Мажлис бачин бувну ия Хъусращиял шяраваллил Халкьуннал театрданул режиссер Марсел Сулайманов. Тяхъашиврийн бавтIминнахь Интдайдихьу барча дуруна Ккуллал райондалул бакIчинал хъиривчу Анатолий Давдиевлул. Ккаккан бувна саннарду ккалаккисса, балайрду тIисса, къавтIавуртту дуллали­сса номерду. Ахирданий бивчуна къавтIи. Мунил лагмагу дуруна къавтIавуртту: «ЦIуцIавуртту цIарахьхьун, цIуллушиву чурххахьхьун» тIисса саннардугу тикрал дуллай. Барча цинявнналагу цасса Интдайдихьу!

Читайте также: