Хъаннил байрандалул хьхьичI гьантрай Лакрал райондалул администрациялий хьунни аьдатравун дагьсса шадлугъ. Райондалул бакIчи Юсуп МахIаммадовлул барча бунни идарарттай зузисса хъами.

Ванал кIицI лавгунни райондалул оьрмулуву хъаннил агьамсса кIану бугьлай бушиву ва миннул захIматрал кьимат лахъшиву, багьа бакъашиву.
– Ва интнил цалчинсса байран, жула билаятрай кIицI лагай ляраличIисса сийлий. Цувгу хъанай дур арамтурал хъаннихасса хIурматрал лишанну. Гьамин, хъаннил заэвсса хъачIунттай буну тIий ужагъгу, оьрчIру хъуни бавугу, хъаннил биялалухь буну тIий кулпатрал дянивсса нахIу-хIалимшивугу, ахIвалгу.

ЗуцIун бавхIусса буну тIий жул, арамтурал, яла язими мурадру – ужагърал чанигу, дакI тIайлашивугу. На чIа тIий ура зун цIуллушиву, тIайлабацIу, давриву хьхьичIуннайшивуртту, алши ва талихI. Лекъащаннав зул дакIурдиву ччавугу, ужагъирттай чанигу, лагь къахьуннав оьрчIал хъяхъаву, хъяхъа тIуннав зул чIарав мудангу тIутIив! – увкунни райондалул бакIчинал.

Барча бунни Юсуп МахIам­мадовлул къуллугърал бурж биттур буллай ливтIусса райондалул низам дуруччай органнал зузалтрал ниттихъул ва щахъами: Субайбат Булатова, Рукьижат МахIаммадова, СалихIат Исмяилова, Султан-ПатIимат Оьмарова. Шадлугърайн бувкIсса цинявппа хъаннин пишкаш дурунни тIутIив ва бахшишру. 
Хъаннихь байран барча дурунни райондалул бакIчинал хъиривчутурал: Абубакар Къюннуевлул, Макьсуд Макьсудовлул, Макьсуд Кьадиевлул, депутатътурал мажлисрал хъунама Шяпи Щурпаевлул.

Вара кьини Юсуп МахIам­мадов ва Абубакар Къюннуев лавгунни барча бан Буттал кIанттул цIанийсса Хъунмасса дяъвилул ветерантурал щахъами: ПатIимат Абакарова, Шагьун Зубаирова ва Гьумаюн Буттаева.

Юсуп МахIаммадовлул барчаллагь увкуна, дяъвилул шиннардил хIасратругу лайкьну дурхIуну, гай шиннардийгу, дяъвилия махъгу райондалул цIаний бувсса захIматрахлу, ласру дунияллия лавгун махъ гайнналмур хъаргу цайнна ларсун, оьрчIру лайкьну тарбия баврихлу. Дуллуна гьарцаннун тIутIив ва бахшишру.