Конкурсирттал барз

Махъсса зурул мутталий Ккуллал райондалул КIулшиву дулаврил управлениялул дурунни шанна конкурс. Цалчинмур конкурс дия райондалул школарттай лакку мазрал дарсру дихьлахьисса учительтурал дянивсса. КIилчинмур дия Дагъусттаннал чичултрал ва шаэртурал канила бувкмур лакку мазрай ккала­ккисса дуклаки оьрчIал дянивсса конкурс. Шамилчинмур – жула литературалуву классиктуран хIисавминнал чивчумур пагьмулий ккалаккисса конкурс.

Ва конкурс най дия кIира кьини. Конкурсрай гьуртту хъанай бия Ккуллал райондалул школарттай лакку мазрал дарсру дихьлахьисса учительтал. Конкурс най дия Ваччиял школалий. Жюрилул председатель, Ккуллал райондалул КIулшиву дулаврил управлениялул каялувчи ТIилиев Камиллул кIицI бувуна конкурсрал мурадну хъанахъишиву учительтурал цала дарс дишаврил пагьму ккаккан баву ва опыт вайми учительтурал дянивгу ппив баву.
Конкурс най дия кIира ятIап­рай, миннун цIардугу дия «Портфолио», «Мастер-класс по предмету» тIисса. Учительтурал ккаккан бувуна цала дарс дишаврил пагьмурду. ОьрчIругу бия гьуртту хъанай, учительнал буллусса суалла­хьхьун жавабру дуллай.
Конкурсрай цалчинмур кIану бувгьунни Ккуллал 1-мур школалул учитель Далиева Гугьаршал, кIилчинмур кIану бувгьунни Ваччиял школалул учитель МахIаммадова Аьйшал, шамилчинмур — Хъусращиял школалул учитель Сулайманова Ларисал. Цалчинмур кIану бувгьусса Далиева Гугьарша гьуртту хьунтIиссар республикалулмур ятIапрайгу. ТIайлабацIу баннав!

Читайте также: