Ххишала хъанай дур захIматрал пишардал сий

Март зурул 20-нний МахIачкъалалив «Дусшиврул къатраву» хьунни WorldSkills Russia -2021 «Жагьилсса пишакартурал» региондалул VI-мур чемпионатрал даврил хIасиллу дуллалисса шадлугърал даражалийсса мажлис. Март зурул 10- нния 20- ннин республикалул колледжирттаву най буссия жагьилсса пишакартурал дянивсса захIматрал пишардал усттаршиву ккаккан дуллалисса чемпионат.

ХьхьичIунсса кIанттурду бувгьусса пишакартал барча буллалисса мажлис тIивтIунни ДР-лул ХIукуматрал Председательнал хъиривчунал бигарду биттур буллали­сса Анатолий Карибовлул.
«Гьашину 63 журасса пишалул усттаршиву ккаккан давриву гьуртту хьуссар 357 пишакар ва лавай­сса даражалул 453 эксперт. Вайннува 31 пиша буссия жагьилтурал дянив яла тIалавми, 5 журасса «Навыки мудрых» тIисса пишалул усттаршиву ккаккан давриву гьуртту хьуссар 50 шинава тихунмайсса оьрмулул инсантал, 19 журасса пишалул магьиршиву ккаккан дуллай бивкIссар чIава жагьилтал. Бяст-ччаллу най бивкIссар республикалул шагьрурдайсса кIулшиву дулаврил идарарттай тIивтIуну бивкIсса майданнай. Исват хъанай бур шиная шинайн магьир хъанай душиву WorldSkills Russia чемпионатрал тIалавшиннардайн бувнусса гьуртту хъанахъиминнал пишакаршиврул магьиршиву.

Республикалий захIматрал пишарду машгьур баврил чемпионатру дуллай байбивхьуния шинмай, чIявусса жагьилтал давурттал щаллу буллан­сса сант ххишала хьунни. Барчаллагь тIий ура бяст-ччаллаву гьуртту хьун бувкIсса хъамаллурахь ва цинявппагу гьурттучитурахь. ДакIнийхтуну барча буллай ура цинявппагу гьурттучитал. ХIакьину зу лайкь дурсса ххувшавуртту хъанахъиссар зула захIматрал ххуллу байбихьлахьисса хъин дайдихьуну. Умуд бур зуяту республикалул ва билаятрал цIа-кьини бюхттул дан­сса пишакартал хьунссар тIисса», – увкунни Анатолий Карибовлул.
Чемпионатрай хьхьичIунсса ккаккияртту хьун дурсса жагьилсса пишакартал барча бунни WorldSkills Russia региондалийсса управлениялул каялувчинал хъиривчу, регионнайсса программарттал каялувчи Людмила Иванюклул.

«Вай бяст-ччаллаву гьуртту хъанай бивкIсса пишакартуран хьусса даврил опыт гихунмай­сса оьрмулул ххуллу язи бугьавриву хъинну бучIи лякъинтIиссар. Шикку зу ккаккан дуллай бивкIсса пишардал усттаршиву хIисав хьусса предприятиярдал каялувчитурал мукIруну бура зу цачIанма даврийн буцинтIишиврий», – увкунни ванил.
Хъирив цинявппагу гьуртту хьусса ва хьхьичIунсса кIанттурду бувгьусса пишакартуран дуллунни медаллу ва дипломру. Конкурсравун къадуххайсса программалул давривухгу гьуртту хьунни 5 региондалиясса 41 инсан.
Барча бавуртту къуртал хьуну махъ, гьурттучитуран ва хъамаллуран концертрал программа ккаккан дунни «Дагестан» тIисса балайрдал ва къавтIаврил ансамбльданул ва жагьилсса балайчитурал.