Март зурул 19-нний 85 шин хьунни суратирттал дунияллий ца яргсса бутIул залуннан, пилчалул ва холстрал магьирсса усттарнан, Дагъусттаннал халкьуннал художник, Аьрасатнал лайкь хьусса художник, ХIамзат ЦIадассал цIанийсса премиялул лауреат, МахIаммадлул арс Хайруллагь Кьурбановлун.
Ларгсса нюжмаркьини Хайруллагь барча уван бувкIун бия Дагъусттаннал культуралул министрнал хъиривчу Мурад ХIажиев ва халкьуннал художник Амирхан МахIаммадов. Вайннал, художник барчагу увну, Дагъусттаннал культуралул министр Зарема Буттаевал цIаниятусса, республикалул культура ва магьирлугъ хьхьичIуннай дувавриву бутIа бишаврихлусса Барчаллагьрал чагъар буллунни. Увну ур Хайруллагь Кьурбанов ХьурукIрав, оьрчIшиву ларгун дур Гъумук. Цала тIийкун, оьрчIнийва сурат дихьлан гъира бусса ивкIун ур. Занай ивкIун ур суратру дишин лахьхьин байсса кружокрайнгу. Амма 1953 шинал, аттестат ласайхту, Бакуйн лавгун ур Навтлил институтравун уххан.
Тиву дуклай унува, луттирдал басмаханалийнгу зун увххун ур. Мажал бирияйхту, суратругу дихьлай икIайсса ивкIун ур. Ванал суратирттай ябавцIуминнал жагьилнан маслихIат бувну бур А. Алимзадел цIанийсса Бакуйннал художествалул училищалувун дуклан уххан. Му къуртал бувайхту, дуклан увххун ур И. Е. Репиннул цIанийсса Ленинградуллал живописьрал, скульптуралул ва архитектуралул институтравун. 1965 шинал зана хьуну ур Дагъусттаннайн, цала творчествагу, педагогнал бюхъу-тяхъагу, гьунаргу, кIулшивурттугу республикалун мюнпатну ишла дуллан. Уттининсса щалва оьрмугу лавгун бур му ххуллий, давриву дакI дирхьуну зий, цаннияр ца ххаллилсса шачIантту битлай.
Ванал дирхьусса суратру кьиматрай ядуллай бур Дагъусттаннал, Ухссавнил АьсатIиннал музейрдаву. Дур ми Аьрасатнаву ва кьатIаллил билаятирттайсса коллекциярттал заллухърунначIагу.
1970 шиная 1997 шинайн ияннин ванал каялувшиву дурссар Дагъусттаннал Художниктурал союзрай. ЧIярусса шиннардий Аьрасатнал Художниктурал союзрал правлениялул членнугу, секретарьнугу ивкIссар, ДАССР-данул Верховный Советрал депутатнугу увчIуну ивкIссар.
ДакIнийхтуну барча дуллай буру жула цIанихсса художникнал юбилей, чIа тIий буру цIакьсса цIуллушиву ва пилча каруннива букьан къаччисса гъира-гьавасгу!
