Гъумукун газ ласун

БакIрайва на ва иширая кказитрайн макьала къачичин пикри бувссия. Ва масъала на цакьнивагу кказитрай кIицI бувссия. Амма, ва иш Ккуллал райондалул чIявусса инсантурал буруккинсса ишну чIалай, чичлай ура цал уттигу. Вана ккур­ккину ряхва барз лавгунни Ккуллал райондалийсса заправкар­ттай газ бакъа. Мукунма инсантурал дукра дуван ишла байсса газрал балонну дуцIингу шяравун машина къабукIлай вайкссава барзру лавгунни. ХIасул хъанай бур суал: циванни укун инсантурай ябацIу буллали­сса? КIулливав ва иширая Да­гъусттаннал бакIчитуран? Гьич къакIулну бакъахьунссар.

Бусласаврийн бувну, заправкарттахь хьуннав, шяравун газ лавсун заназисса машинарттахь хьуннав, лицензия дакъашиврийн бувну къабукIлакIиссар тIий бур газ. На тIайланма учинна: ва тагьар хъуниминнал чулиннайсса жула инсантурал рязий бакъашиву хIасул дуллалисса ишну, хIатта диверсияну къахъанахъиссарив?
Хьуну бурхха Лакрал райондалул бакIчинаща, Юсуп МахIаммадовлуща, бучIан буван газрал балонну дуцIлансса машина. Гъумуксса ца заправкалий бацIан бувну бия мукунсса машина. Нагу лавгун, ттула чIаххувчунащал чIиви машиналий, дуцIав тичча ттула ужагърансса газрал балонну. Бакъаривла ва анаварну бартбигьин багьлагьисса иш?

Читайте также: