Ниттил мазрал нюжмар

Февраль зурул 21-нний щаллагу дунияллий кIицI лагай Ни­ттил мазрал кьини. Ванин хасну Хъювхъиял школа-садрай, февраль зурул 15-нния тIайла хьуну, най дуссия Ниттил мазрал нюжмар.

Ванил мурад бия оьрчIан цала ниттил мазрахсса гъира бутаву, ми жула дакIнихсса творчествалущал, лакрал чичултрал произведениярттащал, лакрал аьдатирттащал, багьу- бизулущал кIул баву. Ниттил мазрал нюжмардул лагрулий хьунни мазрал кьинилун хас дурсса ххаллилсса байрангу.

Шикку тIиртIуну дия лакрал чичултрал луттирдал выставка, дуклаки оьрчIал ва учительтурал буккан бувну бия байрандалун хас бувсса чIирай кказит. Ккаккиялун дирхьуну дия жула бава- ттаттахъал ишла дуллай диркIсса хьхьичIазаманнул кьай- кьуй. Мероприятие хIадур дурну дия лакку мазрал учительница МахIмудова Магьрикаят Оьма­риевнал. Цила ихтилатраву ванил бувсунни ниттил мазрал байрандалул тарихрая, бувсунни цуксса агьамсса кIану бугьлай буссарив ниттил мазрал инсаннал оьрмулуву

– Ниттил маз къакIулсса инсан – му цала мархрая, миллатрал культуралия, аьдатирттая архсса инсанни. Гъалгъа тIутIияра ниттил накI кунма нахIусса, нацIусса лакку мазрай. Ккалаккияра лакрал шаэртурал, чичултрал произведенияртту. Зухь, ялун нани­сса никирахь, хъунмасса бияла буссар жула маз, муницIун жула миллатрал культурагу, аьдатругу ядан, – оьвчаву дунни ванил дуклаки оьрчIайн.

Хъирив дуклаки оьрчIалгу, учительтуралгу бувккунни бу­ттал улклухасса, ниттил мазрахасса шеърирду, увкунни балайрду, ккаккан дунни лакрал аьдатру ва сянатру.

Андриана Абдуллаева

Андриана Абдуллаева

Читайте также: