ДАССР хIасул хьуну 100 шин шаврил лагрулий, Ватан дуруччултрал кьинилун ва Авгъаннава аьрал буккан бувсса кьинилун хасну, вай гьантрай Лакрал райондалий хьунни аьдатравун дагьсса, столданий теннисрай буккаврил турнир.
Бяст-ччал хьунни «Спорт против террора» тIисса девизралу, дуклаки оьрчIал, жагьилтурал ва бугьараминнал дянив. Турнирданул муданасса сакиншинначи ур райондалул Магьирлугърал, спортрал, туризмалул ва библиотекалул системалул центрданул директорнал хъиривчу Малик ХIусманов.
Турнир дайдихьлай, ванал райондалул цинявппагу жагьилтурал цIания барча дунни чIава спортсментурахь Ватан дуруччултрал кьини, чIа увкунни дуккавриву ва спортраву тIайлабацIу. Спортсментуран тIайлабацIу чIа увкунни райондалул бакIчинал хъиривчу Макьсуд Макьсудовлул, цувгу жагьилтурансса эбратну хIакьинусса кьининийнгу хъанахъисса.
Бяст-ччаллий гьуртту хьунни Гъумучиял, Щардал, КIундиннал, ГьунчIукьатIрал, ЧIурттащиял, Хъунайннал ва Хьурттал школарттал дуклаки оьрчIру, 30-нния ливчусса чIава теннисрай буккулт. Дуклаки оьрчIал дянив бяст-ччал бия кIира категориялий: 5-8-ми ва 9-11-ми классирттал дянив. 5-8 -ми классирттал дянив ххув хьунни ХIусман ХIажиев, кIилчинмур кIану бувгьунни Рамазан Сулаймановлул (Хьурттал ООШ), шамилчинмур кIану – Давди Кьурбановлул (ГьунчIукьатIрал СОШ).
9-11-ми классирттал дянив ххув хьунни Руслан Кьурбанов (Щардал СОШ), кIилчинмур кIану бувгьунни АхIмад Ванатиевлул (Хьурттал ООШ), шамилчинмур кIану – Мурад ХIусмановлул (Гъумучиял СОШ).
Жагьилтурал ва бугьараминнал дянив цивппалусса бяст-ччаллий гьуртту хьунни 30 инсан. Ххув хьунни Малик Жабраилов (Гъумучи), кIилчинмур кIану бувгьунни Абусупиян Аьшаевлул (Хъунайми), шамилчинмур кIану – Малик ХIусмановлул (Гъумучи).
Чутсса журалул бяст-ччаллий гьуртту хьунни 8 чут.
Ххув хьунни Абусупиян Аьшаев ва ХIалим ЦIаххаев (Хъунайми), кIилчинмур кIану бувгьунни Расул СутIаевлул ва МахIаммадхан МахIмудиевлул (Ккуллал район), шамилчинмур кIану – Малик ХIусмановлул ва Илияс Аьшаевлул .
Ххув хьуминнан буллунни дипломру ва сакиншинначитурал чулухасса арцуйнусса бахшишру.
